Yfir hundrað látnir í Texas

Björgunaraðgerðir standa enn yfir í nokkrum sýslum. Í umfjöllun AP segir að sjálfboðaliðar frá Mexíkó, Flórída og Louisiana hafi verið sendir til Texas til að hjálpa til við leitina. Miðillinn hefur eftir Greg Abbott ríkisstjóra Texas að 41 sé enn saknað og því sé óttast að tala látinna hækki enn fremur. 

Ellefu er enn leitað í Kerr-sýslu, sem hefur farið einna verst út úr flóðunum. Þar hækkaði vatnsborð Guadalupe-ár um rúma sex metra á innan við tveimur klukkustundum síðastliðinn föstudag. Þar, á bakka Guadalupe-ár, eru stúlknasumarbúðirnar Camp Mystic staðsettar. Minnst 27 stúlkur og starfsmenn sem dvöldu í sumarbúðunum létust í flóðunum og nokkurra er enn leitað. 

Í umfjöllun AP segir að á föstudag hafi rignt jafn mikið og á einum mánuði í ríkinu. Meiri rigningu er spáð í dag og því sé enn hætta á frekari flóðum. 

Stjórnvöld í Texas hafa sætt harðri gagnrýni fyrir að hafa ekki brugðist við viðvörunum vegna flóðanna með réttum hætti. Embættismenn hafa á blaðamannafundum ítrekað að ekkert hafi bent til þess að flóðin yrðu jafn mikil og skæð og raun ber vitni.