Fimm á­stæður þess að Ís­land falli strax út á EM

Stelpurnar okkar eru í riðli með Finnum, heimakonum í Sviss og Norðmönnum. Þær eru sjálfar með skýrt markmið um að verða annað tveggja liða sem komast upp úr þessum riðli og spila í 8-liða úrslitum við lið úr B-riðli (Spánn, Portúgal, Ítalía eða belgíska sveitin hennar Elísabetar Gunnarsdóttur).

Ísland byrjar á leik við Finnland á miðvikudag, mætir svo Sviss á sunnudaginn og Noregi 10. júlí. Ef gamanið endar þann dag þá gætu þetta verið ástæðurnar:

1. Þær léku tíu leiki í röð án sigurs. Já, þó að sigurinn gegn Serbum á föstudaginn hafi vissulega verið kærkominn þá kom hann gegn liði sem náði ekki inn á EM og er í 22. sæti á styrkleikalista Evrópu. Áður hafði Ísland spilað tíu leiki í röð án sigurs; gert fimm jafntefli en tapað fimm. Það hlýtur að hafa áhrif á sjálfstraustið og gæti látið leikmenn gleyma öllu því góða sem skilaði sigrunum frábæru gegn stórliði Þýskalands, Austurríki og Póllandi í fyrra, þegar liðið tryggði sig með stæl inn á EM.
2. Of háðar Karólínu og Sveindísi. Þó að það megi færa rök fyrir því að Glódís Perla sé besti leikmaður liðsins þá er hún ekki endilega mikilvægust. Breiddin er frábær þegar kemur að miðvörðum í íslenska hópnum en fram á við snýst allt um að Karólína teikni eitthvað upp, sem hún er stórkostleg í að gera, eða Sveindís nýti hraðann sinn. Þrír leikir á níu dögum fram undan og mikið álag á þessar tvær sem fengu eiginlega aldrei að spila 90 mínútna leiki með sínum liðum í Þýskalandi í vetur.
3. Staðan á Glódísi. Besti leikmaður liðsins meiddist í vetur, í fyrsta sinn á ferlinum. Píndi sig á verkjalyfjum í gegnum lykilleiki með Bayern en varð á endanum að hvíla sig og missti til að mynda af leikjum við Noreg og Sviss í apríl. Hún er vissulega byrjuð að spila aftur, búin að taka fullan þátt í síðustu landsleikjum en skoraði sjálfsmark gegn Noregi og leit ekki vel út í markinu sem Serbar skoruðu á föstudaginn.
4. Ísland hefur einu sinni unnið leik á EM. Hvaða kröfur er hægt að gera til liðs sem að hefur samtals unnið einn leik á fjórum Evrópumótum? Þó að Ísland hafi verið fastagestur á EM frá og með 2009 hefur liðið nefnilega bara einu sinni fagnað sigri, 1-0 gegn Hollandi árið 2013 með marki Dagnýjar Brynjarsdóttur. Það er sömuleiðis eina skiptið þar sem Ísland hefur komist upp úr sínum riðli og í 8-liða úrslit.
5. Hitinn hentar öllum öðrum betur. Það er ógeðslega heitt hér í Thun þessa dagana. Fólk er beinlínis varað við hitanum sem spáð er að verði yfir þrjátíu gráðum á fyrsta leikdegi. Heimakonur í Sviss hljóta að þekkja það að spila við svona aðstæður, og þó að Noregur og Finnland séu engin hitabeltislönd þá sker Ísland sig úr sem land sem bókstaflega þekkir ekki hitabylgjur. Fimm dagar í Serbíu hjálpa kannski til en stelpurnar okkar gætu átt erfitt með að fóta sig þegar tuttugu gráðum er bætt ofan á sumarhitann sem þær ólust upp við.

Á morgun málum við myndina svo bjartari litum og færum rök fyrir því að Ísland falli alls ekki úr keppni 10. júlí.