Þrjár er­lendar til ný­liðanna á Akur­eyri

Frá þessu er greint á heimasíðu KA í dag en um er að ræða tvær skyttur og markmann.

Trude Blestrud Håkonsen er örvhent skytta sem einnig getur leikið í hægra horninu. Hún er fædd árið 1994 og kemur frá Junkeren í Norður-Noregi þar sem hún hefur spilað frá árinu 2020, og skoraði hún 92 mörk í 22 leikjum í 2. deildinni í vetur.

Ungverjarnir tveir, markmaðurinn Bernadett Réka Leiner og skyttan Anna Petrovics, koma fbáðar frá Greenpower JAGS sem hafnaði í 4. sæti austurrísku úrvalsdeildarinnar í vor. Leiner er 26 ára gömul en Petrovics 23 ára.

Eins og fyrr segir fór lið KA/Þórs, undir stjórn Jónatans Magnússonar, taplaust í gegnum síðustu leiktíð í Grill 66 deildinni eftir fallið úr Olís-deildinni fyrir ári. Stefán Guðnason, formaður kvennaráðs KA/Þórs, segir að áfram verði áhersla lögð á framþróun uppaldra leikmanna þó að nú bætist við þrír erlendir leikmenn fyrir átökin við bestu lið landsins.

„Við viljum að sjálfsögðu spila eins mikið og hægt er á okkar heimastelpum, en það var alveg ljóst að það þurfti að breikka hópinn og styrkja fyrir baráttuna í efstudeild. Koma þremenninganna er klárlega lykilskref fyrir hópinn okkar og teljum við okkur vera að taka rétt skref í framþróun okkar uppöldu leikmanna. Jonni þjálfari hefur margoft sýnt að hann er gríðarlega öflugur í að vinna með og þróa unga leikmenn áfram og verður gaman að sjá hópinn taka næstu skref með þeim Bernadett, Önnu og Trude innanborðs,“ segir Stefán í fréttatilkynningu.