Á­kærð fyrir að myrða táning en líkið enn ófundið

Hin sautján ára gamla Pheobe Bishop hvarf sporlaust þann 15. maí en þau James Wood (34) og Tanika Bromley (33), sem bjuggu með Bishop, hafa verið ákærð fyrir að myrða táninginn.

Wood hafði verið handtekinn en honum var sleppt úr haldi án ákæru í gær.

Bishop skilaði sér aldrei á flugvöll þann 15. maí, þar sem hún átti bókað flug, en það var ekki fyrr en 21. maí sem lögreglan lýsti því yfir að grunur léki á um að eitthvað glæpsamlegt hefði átt sér stað.

Íbúin þar sem þremenningarnir bjuggu varð þá yfirlýstur vettvangur glæps og sömuleiðis bíll Bishop. Í frétt Ríkisútvarps Ástralíu segir einnig að umfangsmikil leit hafi átt sér stað í þjóðgarði skammt frá heimili þeirra. Hún stóð yfir í fimm daga en skilaði ekki árangri.

Lögreglan sagði í dag, þegar ákærurnar voru tilkynntar, að lík Bishop hefði ekki fundist enn. Áfram yrði þó leitað eins og hægt væri.

Hin ákærðu verða færð fyrir dómara á morgun.

Kylie Johnson, móðir Bishop, hefur verið að biðla til fólks um upplýsingar um hvað hafi komið fyrir dóttur hennar. Hún sagðist í dag hafa fengið upplýsingar frá lögreglu um að dóttir hennar væri látin.

Hún biður fólk enn um að stíga fram, hafi það upplýsingar um málið. Fjölskylda Bishop verði að leggja hana til hinstu hvílu.