Keyrði frá Sauð­ár­króki í Garða­bæ fyrir einn gítartíma

Hér má sjá tónlistarmyndbandið:

Reynir Snær hefur komið víða að í tónlistinni og spilað með flestöllum vinsælustu tónlistarmönnum landsins. Hann er mikill gítarsnillingur og ákvað á árinu að fara að gefa út eigin tónlist.

„Síðastliðin mánaðamót gaf ég út mína fyrstu EP plötu og á henni er ein ábreiða af lagi sem hefur lengi vel verið í miklu uppáhaldi hjá mér. Það er sömuleiðis rótgróið í íslensku þjóðarsálina.“ 

Með átrúnaðargoðinu

Lagið sem um ræðir er Þrek og tár sem flest þekkja í ódauðlegum flutningi Hauks Morthens og Erlu Þorsteinsdóttur.

„Þar sem þetta er dúett á milli karls og konu þá langaði mig að halda í það samspil í minni ósungnu útgáfu. Í upphafi lagsins spila ég á groddalegan baríton gítar og skipti yfir í svokallaðan lap steel gítar sem ég get spilað fljótandi háa tóna með.“

Reyni langaði að taka þetta lengra og gera lifandi flutning af ábreiðunni.

„Ég fékk því Ómar Guðjónsson til liðs við mig. Ég hef kannast við Ómar frá árinu 2012, þá var ég átján ára gamall og heyrði frá Sauðárkróki alla leið í Garðabæinn til að hitta hann í tveggja klukkustunda gítartíma. Það er óhætt að segja að Ómar hafi verið og sé enn eitt af mínum átrúnaðargoðum.“

Galdrahljóðfæri og galdramaður

Allt frá árinu 2012 hafa leiðir þeirra vina legið saman hér og þar. Þeir spiluðu þó saman í fyrsta sinn í fyrra og í kjölfarið hafa nokkur gigg komið. 

„Mér þykir mikið vænt um að hafa fengið Ómar með mér í þennan flutning þar sem hann er einn af þeim sem hefur veitt mér mikinn innblástur til að framleiða eigin músík. 

Þrátt fyrir að hafa einungis farið í þennan eina gítartímar fyrir vel rúmum áratugi síðan þá hef ég tekið mikið frá honum bæði í tali og tónum, líklega honum óafvitandi.

Í flutningnum spila ég á umræddan baríton gítar og Ómar leikur á pedal steel sem er galdrahljóðfæri og Ómar galdramaður.“

Upptökur fóru fram í pappírslager Ólafs Þorsteinssonar ehf. Myndbandið er tekið upp á gamla filmuvel í eigu Kidda Hjálms (Kristins Jónssonar) sem mixaði sömuleiðis hljóð. Upptöku á hljóði og mynd sá Gestur Sveinsson um en hann klippti einnig myndbandið.

„Við tökum óvart upp aukalag í þessu sessioni því það voru nokkrar mínútur eftir á filmunni í myndavélinni. Lagið er af væntanlegri plötu Ómars og heitir Amma Lukka. Hægt er að nálgast allan flutninginn á Youtube og einnig hlusta á hann á streymisveitunni Spotify.“