Enski boltinn

Gætu hent Crystal Palace út úr Evrópudeildinni

Óskar Ófeigur Jónsson skrifar
Crystal Palace leikmennirnir Dean Henderson og Ebere Eze fagna sigri Palace í enska bikarnum út á götu í suður London.
Crystal Palace leikmennirnir Dean Henderson og Ebere Eze fagna sigri Palace í enska bikarnum út á götu í suður London. Getty/Sebastian Frej

Crystal Palace tryggði sér sinn fyrsta titil í sögu félagsins á dögunum þegar liðið varð enskur bikarmeistari eftir sigur á Manchester City á Wembley en um leið þá tryggði félagið sér sæti í Evrópukeppni í fyrsta sinn.

Sú gleði gæti nú breyst í martröð vegna rekstrarreglna Knattspyrnusambands Evrópu.

Crystal Palace gæti nefnilega misst Evrópusætið til Brighton. Ástæðan er eigandi félagsins, milljarðamæringurinn John Textor.

Enskir miðlar eins og Daily Mail segja frá því að UEFA gæti komið í veg fyrir þátttöku Crystal Palace í Evrópukeppninni. Samkvæmt fréttum þá hafa fulltrúar enska félagsins verið á neyðarfundi með CFCB sem er sú nefnd hjá UEFA sem passar upp á það að félögin fari eftir rekstrarreglum sambandsins.

Textor á meirihluta í Palace en hann hefur verið að reyna að selja hlut sinn í félaginu. Vandamálið er að hann á einnig franska félagið Lyon.

Lyon vann sér einnig þátttökurétt í Evrópudeildinni. Tvö liða hans eru því í sömu keppni.

Samkvæmt reglum UEFA þá mega félög í eigu sömu eigenda ekki taka þátt i sömu Evrópukeppni.

Það væri heldur ekki lausn að færa Palace niður í Sambandsdeildina því þar danska félagið Bröndby sem er einnig í eigu John Textor.

Ef UEFA sparkar Crystal Palace úr Evrópudeildinni, þá myndi Nottingham Forest taka það sæti í Evrópudeildinni og Brighton kæmi síðan inn í Sambandsdeildina í staðinn fyrir Forest.




Fleiri fréttir

Sjá meira


×