Á­kall

Áfallið að greinast með krabbamein er nóg fyrir sig – það á ekki að bætast við frestun meðferðar vegna skorts á tækjum.

Ríkisstjórnin segist vera verkstjórn, en verk eru það sem fólk sér – ekki orð. Ég bið um það sjálfsagða: Að við sem þjóð tryggjum að allir sem þurfa lífsnauðsynlega meðferð, fái hana – strax.

Látum röddina berast.

Við getum þetta – saman.

———————————————————

Þegar loforðin fljúga út fyrir landsteinana… en lífið bíður heima.

Ríkisstjórnin kallar sig verkstjórn – en verkin eru ekki sýnileg þar sem þeirra er mest þörf.

Á meðan forsætisráðherra og utanríkisráðherra eru meira erlendis en heima, þar sem þær lofa auknum fjárframlögum til erlendra stofnana og verkefna, fáum við þau skilaboð hér heima að ekki sé til fjármagn fyrir lífsnauðsynleg lækningatæki til krabbameinsmeðferðar.

⸻

Frú forsætisráðherra – Kristrún Frostadóttir

Eru landar þínir ekki þess virði að fá úrbætur í heilbrigðiskerfinu – í garðinum sem stendur þér næst?

Þú virðist sjaldnast vera hér heima – og sýnist kappkosta að sinna því sem er utan landsteinanna.

Frú utanríkisráðherra – Þorgerður Katrín Gunnarsdóttir

Er virkilega nauðsynlegt að þið báðar séuð stöðugt erlendis að sinna hagsmunum annarra, á meðan landsmenn bíða eftir nauðsynlegri meðferð við krabbameini?

Frú félags- og húsnæðismálaráðherra – Inga Sæland

Þú sagðir: „Við látum verkin tala.“

En hvar eru verkin þegar kemur að fjárfestingu í tækjum sem bjarga mannslífum?

⸻

Ég spyr:

• Hvað kosta þessi tæki sem vantar?
• Hvað kostar að senda sjúkling til útlanda í meðferð?
• Getur verið að það séu baunateljarar og Excel-skjöl sem ráði för?
• Hvers virði er eitt mannslíf – í tölum?
• Og hvað kostar aðskilnaður frá fjölskyldu þegar sjúklingur er sendur í meðferð erlendis – og aðstandendur þurfa að bera þann kostnað sjálfir?

⸻

Kæra þjóð.

Ef þau sem hafa völdin sjá ekki neyðina, þá verðum við að stíga fram.

Tökum höndum saman – þrýstum á valdhafa, virkjum fjölmiðla, og blásum til þjóðarátaks til að fjármagna tæki sem geta bjargað lífi.

Þetta er ekki munaður.

Þetta er mannúð.

Þetta er nauðsyn.

Við getum gert betur. Við verðum að gera betur.