Þeir bestu (6. sæti): Mókollur, Uxi og sumarið 1995

6. Arnar Gunnlaugsson

Líklega hefur ekki verið fjallað meira um einn einstakling í íslenska boltanum síðustu árin og Arnar Gunnlaugsson. Og skiljanlega. Eftir flottan feril sem leikmaður hefur Arnar orðið framúrskarandi þjálfari og síðan er hann líka eins mikil stjarna og hægt er að vera í litla fótboltaheiminum okkar. Kastljósið beinist ósjálfrátt að Arnari og fólk sperrir eyrun þegar hann talar.

Það er því kannski ekki hægt að segja margt nýtt um hann. Tímabilinu 1995 hefur til dæmis verið gerð frábær skil í Skaganum og A&B. En fimmtán mörk í sjö leikjum það sumarið verður alltaf jafn mikil sturlun.

Arnar skoraði líka fimmtán mörk tímabilið 1992, þá nítján ára, þegar ÍA varð Íslandsmeistari sem nyliði og það skilaði honum til Feyenoord ásamt Bjarka bróður.

Arnar var alkominn heim 2003. Tvíburabæðurnir gengu þá í raðir KR sem var með einn svakalegasta hóp sem hefur verið settur saman hér á landi; Arnar og Bjarki, Veigar Páll, Einsi Dan, Siggi Raggi, Garðar Jóhanns, Sigurvin Ólafs og svo mætti áfram að telja. KR-ingar urðu Íslandsmeistarar annað árið í röð en ekki með mesta glansinum. Veigar Páll var aðalmaðurinn í KR-sókninni en Arnar minnti nokkrum sinnum á sig. Eftirminnilegasta frammistaðan var gegn Fylki í fjórðu síðustu umferð. Arnar skoraði þrennu í 4-0 sigri KR og svo tvö mörk í 1-3 sigri í Grindavík í umferðinni þar á eftir þar sem KR-ingar tryggðu sér Íslandsmeistaratitilinn. 

Næstu tvö tímabil voru algjört bleh hjá KR og Arnar sneri aftur á Skagann 2006. Tímabilið tók reyndar óvænta stefnu því þeir Bjarki enduðu á því að þjálfa liðið. Það spilaði skemmtilegan fótbolta undir stjórn þeirra enda þungvopnað fram á við.

Arnar lék svo í eitt og hálft tímabil með FH og bætti einum Íslandsmeistaratitli og einum bikarmeistaratitli á ferilskrána áður en þeir Bjarki tóku aftur við ÍA um mitt tímabil 2008. Það fór ekki vel og eftir stutta og skrítna millilendingu í Val fór Arnar í Hauka 2010 og lauk síðan ferlinum með Fram árið eftir.

Haukar féllu og Fram næstum því en Arnar náði samt að skora samtals fimmtán mörk þessi tvö tímabil, þar á meðal sigurmark Fram gegn Víkingi í lokaumferðinni 2011, í síðasta leik sínum á ferlinum.

Þetta var samt eflaust ekki endirinn sem Arnar sá fyrir sér og hann hefur verið heiðarlegur með að ferilinn hefði getað orðið mun betri. En hann var ekkert slor. Hann spilaði í ensku úrvalsdeildinni og hér heima gerði hann allt sem hægt var að gera. Varð fjórum sinnum Íslandsmeistari, einu sinni bikarmeistari, vann tvenna gullskó og síðan er það auðvitað sumarið fyrir þrjátíu árum. Við munum sennilega aldrei sjá svoleiðis aftur, hvorki innan eða utan vallar. Mókollur, Uxi og Arnar Gunnlaugsson. Árið 1995 var árið þeirra og það lifir í minningunni.