Norður­landa­mót í hermi­akstri haldið á Ís­landi

Mótið hefst klukkan tíu í fyrramálið og verður í beinu streymi á Vísi. Hvert ríki sendir fjóra keppendur og því berjast tuttugu ökuþórar um tvo titla. Annars vegar er keppt á AMG Mercedes GT3-bílum og svo í FIA F4-flokki.

„Þetta eru mjög sterkir þátttakendur allir. En að sjálfsögðu er stefnt á sigur og við verðum bara að sjá hvernig það gengur. Margir af þessum keppendum eru að keppa fyrir erlend keppnislið.“

„Það eru þarna aðilar sem eru að keppa fyrir Mercedes hermiakstursliðið, Williams, sem eru stór nöfn í bransanum. Þannig við vitum að þetta eru góðir ökumenn,“ segir Jón Þór Jónsson, formaður Akstursíþróttasambands Íslands.

Þetta er í annað sinn sem Norðurlandamótið er haldið. Landsliðsmaður stefnir hátt.

„Ég held þetta verði geðveikt gaman, sama hvað gerist,“ segir Gunnar Karl Vignisson, landsliðsmaður.

Eigið þið einhvern séns á að vinna þetta?

„Allan daginn.“

Þú hefur trú á þér og þínu fólki?

„Já, vægast sagt,“ sagði Gunnar.

Allir ættu að geta haft gaman af því að horfa á mótið.

„Það verður örugglega eitthvað action og drama og einhverjir árekstrar og læti,“ segir Jón Þór.

Fréttamaður, sem þykist almennt ansi lunkinn við stýrið, spreytti sig í herminum. Hægt er að sjá hvernig það gekk í klippunni hér fyrir ofan.