Losað um hlekki Jóns Dags sem lagði upp eftir tuttugu sekúndur

Jón Dagur hafði aðeins fengið að koma við sögu í einum deildarleik á þessu almanaksári, einnig sem varamaður, þegar honum var skipt inn á í upphafi seinni hálfleiks í dag, í 3-2 útisigri gegn Ulm.

Hann hafði aðeins verið inni á vellinum í rúmar tuttugu sekúndur þegar hann lagði upp jöfnunarmark fyrir Fabian Reese, 1-1. Reese skoraði aftur skömmu síðar og þó að Ulm næði að jafna þá vann Hertha a lokum góðan sigur með marki frá Florian Niederlachner á 84. mínútu.

Eftir afar dapurt gengi hefur Hertha nú unnið fjóra af síðustu fimm leikjum sínum og er í 11. sæti af 18 liðum, með 39 stig, svo gott sem búið að tryggja sér áframhaldandi veru í deildinni. Ulm er hins vegar næstneðst með 26 stig og í mikilli fallhættu nú þegar 30 umferðum af 34 er lokið.

Hólmbert Aron Friðjónsson lék síðustu tuttugu mínúturnar fyrir Preussen Münster sem tapaði á útivelli gegn Köln, 3-1. Kölnarbúar eru því á toppi deildarinnar með 54 stig en Münster er í fallumspilssæti með 28 stig, fimm stigum frá næsta örugga sæti og aðeins tveimur stigum fyrir ofan Ulm sem er í fallsæti.