Sonur Ringo Starr rekinn úr The Who

Brottrekstur Starkey má samkvæmt umfjöllun Sky rekja til styrktartónleika The Who fyrir krabbameinsveikt ungt fólk sem haldnir voru í mars. Í tónleikagagnrýni sem birt var á breska miðlinum Metro segir að Roger Daltrey, aðalsöngvari hljómsveitarinnar, hafi á tónleikunum verið sýnilega pirraður út í frammistöðu Starkey það kvöld. 

Í sameiginlegri yfirlýsingu sem The Who sendi frá sér fyrr í vikunni segir að sameiginleg ákvörðun hafi verið tekin um að Starkey segði skilið við hljómsveitina. 

Starkey segir aftur á móti í yfirlýsingu til Rolling Stone að brottreksturinn komi honum á óvart.

„Eftir að hafa spilað þessi lög öll þessi ár kemur þetta mér verulega á óvart og það hryggir mig að heyra að einhverjum hafi mislíkað frammistöðu mína þetta kvöld. En hvað er til ráða?“

Starkey gekk í hljómsveitina árið 1996. Upprunalegur trommari hljómsveitarinnar, Keith Moon, lést árið 1978 og segir Starkey mikinn heiður að hafa fengið að feta í fótspor Keith „frænda“, en Moon var fjölskylduvinur Starkey.