Stórir draumar í Laugar­dalnum: „Allir vilja að Þróttur fari sem hæst“

Í fjórða þætti þriðju þáttaraðar Lengsta undirbúningstímabils í heimi tók Baldur Sigurðsson hús á Þrótturum. Hann ræddi meðal annars við fyrirliðann Álfhildi Rósu Kjartansdóttur og þjálfarann Ólaf Kristjánsson um væntingar þeirra.

Þróttur hefur alltaf endað í efri helmingi efstu deildar síðan liðið kom upp 2020 og það komst einnig í bikarúrslit 2021. Þróttur hefur aldrei unnið stóran titil í fótbolta, hvorki í karla- né kvennaflokki, en Álfhildi og Ólaf langar að breyta því.

„Draumurinn minn að gera eitthvað fyrir Þrótt, hjálpa þeim og þessari uppbyggingu sem er í gangi og vinna eitthvað fyrir þá. Það væri draumur,“ sagði Álfhildur sem hefur verið fyrirliði Þróttar síðan hún var átján ára.

Ólafur vill sjá Þrótt gefa í og bæta árangur síðasta tímabils þegar liðið endaði í 5. sæti.

„Við viljum bæta okkur frá síðasta tímabili, vera nær þessum toppliðum og á einhverjum tíma gera atlögu að því að þetta verði ekki svona mikið forskot sem Breiðablik og Valur hafa haft. Hvort það verður í sumar eða 2026 verður tíminn að leiða í ljós en við erum með hörkuhóp og hörkulið. Það hefur verið vel staðið að því að bæta inn í og ég er mjög ánægður með stöðuna á hópnum eins og hún er akkúrat í dag,“ sagði Ólafur sem tók við Þrótti fyrir síðasta tímabil.

„Allir vilja að Þróttur fari sem hæst. Hvað erum við tilbúin að leggja mikið á okkur? Hvað erum við tilbúin - eins og góður maður segir - þjást til að ná í úrslitin. Þolinmæði, tími en þegar möguleikarnir eru áttu að reyna að grípa þá.“

Þróttur fær Fram í heimsókn í 1. umferð Bestu deildarinnar eftir viku.