Boðar brott­vísanir brota­manna og af­nám á­tján mánaða reglu

Þetta kemur fram í tilkynningu frá dómsmálaráðuneytinu á vef Stjórnarráðsins. Þar segir að frumvarpið sé í samræmi við stefnuyfirlýsingu ríkisstjórnarinnar um að gæta samræmis við reglur nágrannaríkja og Evrópusambandsins á sviði útlendingamála.

Hljóti frumvarpið náð fyrir augum þingsins verði heimilt að afturkalla alþjóðlega vernd og brottvísa einstaklingum sem fremja alvarleg afbrot eða ógna öryggi ríkisins. 

„Ég hef talað skýrt í þessu máli og legg nú til að heimilt verði að afturkalla alþjóðlega vernd ef gildar ástæður eru til að álíta viðkomandi hættulegan öryggi ríkisins eða hann hefur hlotið dóm fyrir sérstaklega alvarlegt afbrot og er af þeim sökum hættulegur samfélaginu,“ er haft eftir Þorbjörgu Sigríði Gunnlaugsdóttur dómsmálaráðherra.

Ætla að afnema 18 mánaða reglu

Frumvarpið felur einnig í sér að ákvæði í lögum sem heimila veitingu dvalarleyfis á grundvelli tafa og mannúðarsjónarmiða falla úr gildi. Núverandi regluverk kveður á um að fólk fái sjálfkrafa dvalarleyfi hafi ekki verið tekin ákvörðun um mál þeirra innan ákveðins tíma frá því umsókn um alþjóðlega vernd barst. Sá tími er 18 mánuðir í tilviki fullorðinna, en 16 mánuðir í tilviki barna.

Ísland sé eina landið í Evrópu þar sem regla sem þessi er í gildi. Eftir afnám hennar muni allir umsækjendur áfram fá efnislega niðurstöðu í sín mál.

Tugir milljarða á þremur árum

Í tilkynningunni segir einnig að að árin 2022 til 2024 hafi verið metár þegar kemur að fjölda verndarumsókna, sem hafi valdið gríðarlegu álagi á innviði. Það hafi einnig heimt mikil útgjöld af hálfu ríkisins, og að 38 milljarðar króna hafi á þessum árum runnið til málaflokksins. Þessi fjöldi og álag hafi líka haft veruleg áhrif á málsmeðferðartíma.

„Með þessu erum við að samræma reglur um útlendinga við nágrannaríki okkar og afnema séríslenskar reglur“ er haft eftir dómsmálaráðherra.

„Áskoranir hafa verið mjög miklar og við þurfum að ná betri tökum á þessu. Það er alveg deginum ljósara. Fólk sem leitar hingað eru ekki óvinir okkar heldur manneskjur í leit að betra lífi. Hins vegar verðum við að hafa sambærilegar reglur og nágrannaríki okkar og tryggja að við ráðum betur við þennan málaflokk. Með betri samræmingu mun kerfið vera skýrara og virka betur fyrir þau sem þurfa raunverulega á því að halda. Í leiðinni munum við spara milljarða sem verður m.a. hægt að nota til að efla löggæslu og byggja nýtt fangelsi. Þá þurfum við líka að huga betur að móttökukerfinu okkar og vinna að því að börn sem flytjast hingað hafi jöfn tækifæri á við íslensk börn.“