Segist vera nas­isti sem elskar Hitler

Kanye West hefur í gegnum tíðina lent ítrekað í vandræðum vegna heimskulegra og jafnvel fordómafullra ummæla sinna. Vandræði hans náðu sennilega hámarki árið 2022 þegar hann lét andgyðingleg ummæli fala þónokkrum sinnum. 

Í október það ár var honum vísað á dyr á samfélagsmiðlinum X og á Instagram eftir að hafa birt færslur sem hvöttu til ofbeldis gegn gyðingum. Hann sagðist í kjölfarið ekki geta verið gyðingahatari því hann sé svartur. Skömmu síðar klæddist hann bol með áletruninni „White Lives Matter“ á tískusýningu í París. Í kjölfarið sleit Adidas samningi sínum við rapparann og fleiri fyrirtæki sömuleiðis. 

Rúmum mánuði eftir að rapparanum var hleypt á X á nýjan leik var hann aftur bannaður eftir að hafa deilt mynd af Davíðsstjörnunni og hakakrossinum blönduðum saman. Í sömu viku kom Ye fram í þættinum InfoWars og sagði meðal annars: „Það er margt sem ég elska við Hitler. Margt.“

Það var svo í desember 2023 sem rapparinn baðst afsökunar á ummælum sínum og sagðist sjá „innilega eftir öllum þeim sársauka“ sem hann kynni að hafa valdið.

Hann hefur haldið sig mestmegnis á mottunni síðan þá þó hann segi reglulega einhverja tóma þvælu. Nú virðist eitthvað vera farið að liðkast um málbeinið á kauða. 

Síðustu helgi mætti hann með eiginkonu sinni, Biöncu Censori, á Grammy-hátíðina og vöktu þau hjónin athygli vegna þess að hún var nánast allsber. Nokkrum dögum síðar greindi West frá því að hann teldi sig ranglega greindan með geðhvörf og væri í raun með einvherfu.

Elskar Hitler og segist vera nasisti

Síðustu klukkutíma hefur rapparinn svo farið hamförum á X. Fyrstu færslurnar sem birtust í morgun, um miðnætti að staðartíma, sneru að rapparanum P. Diddy en hann virðist eytt þeim öllum. 

Síðustu fjóra klukkutíma hefur hann tvítað 53 sinnum og snúa þau allflest að gyðingum, nasisma og slaufun West.

„Ég elska Hitler, hvað nú tíkur,“ sagði hann í fyrsta tvítinu og tvítaði þvínæst: „Sjáum hvort þið skilið peningunum núna.“

„Ég er nasisti,“ tvítaði hann svo og sagði í enn öðru tísti: „Ég segi það sem ég vil píkur.“

Gyðingar hati hvítt fólk og noti svart fólk

Hann beindi síðan sjónum sínum að öðrum röppurum sem hann sagði fátæka og ófyndna áður en hann hóf langa tístrunu um gyðinga, svart fólk og hvítt fólk.

„Allt hvítt fólk er rasískt,“ sagði hann í einu þeirra og „gyðingar hata hvítt fólk og nota svart fólk“ í öðru. Þá sagði hann gyðinga alltaf reyna að stela peningum fólks.

„Ég elska þegar gyðingar koma til mín og segjast ekki geta unnið með mér lengur, það er uppáhaldið mitt,“ tvítaði hann svo.

„Ég mun ekki segja neitt vont um Kína. Þau sýndu mér alltaf ást þegar Ameríkanar sneru baki við mér út af rauðum hatti og bol. Ég fæ pening frá Kína. Ég elska Kína. Guð lét móður mína fara þangað þegar ég var tíu ára af ástæðu,“ tvítaði hann síðan.

„Kallaðu mig Yaydolf Yitler“

Áfram hélt hann og sagðist hata rappara og þeir klæddu sig illa. Hann umgengdist aðeins fólk sem hann hefði not af og þyrfti ekki lengur á vinum að halda, vinir væru bara fyrir börn.

„Ég get sagt gyðingur eins mikið og ég vil, ég get sagt Hitler eins mikið og ég vil. Staðreyndin er að ég segi það þegar ég vil,“ tvítaði hann síðan og sagðist ætla að normalísera það að tala um Hitler alveg eins og það hefði verið normalíserað að tala um að myrða svart fólk.

Sjá einnig: „Það er margt sem ég elska við Hitler“

„Kallaðu mig Yaydolf Yitler og tíkin þín vill samt ríða,“ tvítaði hann skömmu síðar.

Hann virðist svo vera farinn að undirbúa sig undir viðbrögðin og segir að verði tónlist hans tekin af streymisveitum muni það bara gera hann ríkari. Allar tilraunir fólks til að stjórna honum muni aðeins gera hann ríkari.

Loks tvítaði hann fyrir klukkutíma gamalli mynd af sér í bol sem á stóð „Segðu nei við nasistum“ og sagðist líka hafa verið „woke“ einu sinni.