Átta ára fangelsis­vist stað­fest

Landréttur kvað upp dóm í máli Kouranis upp úr klukkan 15.. Kourani var dæmdur í átta ára fangelsi í júlí í fyrra fyrir að reyna að ráða Mustafa Al Hamoodi, eiganda OK Market, af dögum með hnífi í mars síðastliðnum, sem og fyrir önnur brot, líkt og fyrir að hóta lögreglumanni og fjölskyldu hans lífláti, og kasta hlandi á fangaverði.

Kourani og mál sem honum tengjast hafa verið mikið til umræðu síðan hann var fyrst nafngreindur í fjölmiðlum. Það var gert í frétt Vísis í apríl í fyrra. Þá hafði hann verið úrskurðaður í gæsluvarðhald fyrir stunguárásina í OK Market.

Hefur valdið vandræðum víða

Ofsóknir Kouranis á Helga Magnúsi Gunnarssyni, vararíkissaksóknara, hafa dregið dilk á eftir sér. Helgi Magnús sagði í viðtali við Vísi eftir að dómur gekk í héraði að margir fögnuðu því að Kourani væri kominn á bak við lás og slá. Ekki síst hann sjálfur enda hefði Kourani ofsótt hann um árabil.

Þá sagði hann Kourani ýkt dæmi en Íslendingar væru  í stórum stíl að flytja inn kúltur sem væri í mörgu frábrugðinn því sem þeir þekkja.

„Það eina sem stoppar þá er hnefinn, valdbeiting. Ekki er alls staðar sú sama afstaða til laga og réttar og hjá okkur. En við verðum að sætta okkur við það.“ Þessi ummæli hans voru kærð til lögreglu af samtökunum Solaris, sem berjast fyrir hagsmunum flóttafólks. Sakamálarannsókn vegna ummælana er í fullum gangi, samkvæmt heimildum Vísis.

Þá urðu ummælin til þess að Sigríður J. Friðjónsdóttir, ríkissaksóknari afþakkaði vinnuframlag Helga Magnúsar og því mætir hann ekki í vinnuna þessa dagana en heldur fullum launum. Starfsmannamál hjá Ríkissaksóknara voru það fyrsta sem nýr dómsmálaráðherra fékk í fangið og enn er unnið að lausn málsins í ráðuneytinu.

Skipti um nafn

Þá vakti Kourani mikla athygli og talsverða hneykslan þegar hann breytti nafni sínu í Mohamad Th. Jóhannesson. Hann var sagður hafa litið til fyrrverandi forseta Íslands, Guðna Th. Jóhannessonar, þegar hann valdi nafnið og því var tekið illa af ýmsum.

Í samskiptum við Vísi, í gegnum verjanda hans, vildi Kourani ekki staðfesta að það hefði vakað fyrir honum. Hann teldi einfaldlega eðlilegt að taka upp íslenskt nafn og Thor Jóhannesson væri „eðlilegt nafn“.