Þrjár í fram­boði for­manns Fíh

Í tilkynningu frá félaginu segir að hjúkrunarfræðingar sem eru með fulla aðild, fagaðild og lífeyrisaðild hafi atkvæðisrétt í formannskosningum. Atkvæðagreiðslan verður rafræn og kjörseðill aðgengilegur í gegnum Mínar síður. Farið verður í aðra umferð á milli þeirra tveggja sem hljóta flest atkvæði nái enginn einn frambjóðandi meira en 50 prósent atkvæða.

Hulda Björg hefur frá útskrift 2006 starfað á bráðamóttöku Landspítalans, á heilsugæslunni í Árbæ, hjá Icepharma, Hrafnistu og Sóltúni. Hulda Björg er varaformaður félagsins og hefur verið í stjórn þess síðustu þrjú árin.

„Í dag starfa ég sem fagstjóri hjúkrunar á Heilsugæslunni í Mjódd. Síðastliðin þrjú ár hef ég setið í stjórn Félags íslenskra hjúkrunarfræðinga sem aðalmaður og gjaldkeri stjórnar. Síðastliðið starfsár hef ég gegnt hlutverki varaformanns Félags íslenskra hjúkrunarfræðinga. Á þessum árum sem ég hef starfað í stjórn félagsins og sem varaformaður hef ég öðlast dýrmæta reynslu sem snýr að rekstri félagsins og hagsmunamálum hjúkrunarfræðinga,“ segir Hulda Björg í kynningu á heimasíðu félagsins.

Helga Rósa Másdóttir hefur frá útskrift árið 2004 einnig komið víða við. Á heilsugæslu, bráðamóttöku, á sjúkrahúsinu í Neskaupstað og á Indlandi. Eftir það sneri hún aftur á bráðamóttökuna þar sem hún starfaði um árabil. Frá árinu 2023 hefur hún starfað sem sviðstjóri fagsviðs hjá Félagi íslenskra hjúkrunarfræðinga.

„Laun og kjör hjúkrunarfræðinga eiga að endurspegla ábyrgð, menntun, hæfni og reynslu þeirra. Það þarf að byggja á því jákvæða skrefi sem tekið var við síðustu kjarasamninga þar sem samið var um nýja launatöflu sem gerir samanburð við aðra háskólamenntaða sérfræðinga auðveldari. Brýnt er að halda þeirri vinnu áfram við stofnanasamninga til að mynda en þar liggja tækifæri til frekari kjarabóta og starfsþróunar hjúkrunarfræðinga,“ segir Helga Rósa sem fer yfir sín áherslumál hér.

Jórunn Ósk Frímannsdóttir Jensen er menntaður hjúkrunarfræðingur en einnig búin með meistaranám í opinberri stjórnsýslu. Jórunn er gjaldkeri félagsins og hefur víðtæka reynslu af bæði hjúkrun og stjórnun samkvæmt kynningu á vef félagsins.

„Hagsmunagæsla hjúkrunarfræðinga fer fram á mörgum vígstöðvum og mikilvægt að félagið eigi sterkan talsmann meðal aðildarfélaga og innan stjórnsýslunnar. Þó nú sé í höfn kjarasamningur til næstu fjögurra ára er ástæða til að hefja undirbúning fyrir næstu kjaraviðræður. Laun hjúkrunarfræðinga þurfa að hækka, hækkun grunnlauna er forsenda þess að viðhalda stéttinni og tryggja áfram gott heilbrigðiskerfi til framtíðar. Jákvætt skref var tekið með vörpun í nýja töflu sem styrkir okkur í samanburði til frekari hækkunar grunnlauna. Það er aldrei mikilvægara en nú að standa vörð um menntun, þekkingu og símenntun okkar ásamt skilgreiningu ábyrgðar. Eftirspurn eftir hjúkrunarfræðingum er þegar meiri en framboð og mun aukast, framtíð hjúkrunar er björt og tækifærin mörg,“ segir Jórunn í sinni kynningu hér.