Ísak Berg­mann með mark að hætti pabba síns

Ísak Bergmann skoraði fyrsta mark liðsins í leiknum. Þetta var sjöunda deildarmark Ísaks á tímabilinu þar af það fimmta sem hann skorar í síðustu sjö leikjum.

Ísak Bergmann spilaði allan leikinn en Valgeir Lunddal Friðriksson var tekinn af velli í hálfleik.

Düsseldorf skoraði tvö mörk á fyrstu fimmtán mínútum leiksins en Ulm náði tvisvar sinnum að jafna metin.

Sigurmark Düsseldorf kom úr vítaspyrnu á 60. mínútu leiksins.

Ísak Bergmann skoraði markið sitt á níundu mínútu með þrumuskoti af löngu færi. Þetta var svona mark að hætti pabba hans en Jóhannes Karl Guðjónsson var þekktur fyrir að skora af löngu færi á sínum ferli.

Dawid Kownacki kom liðinu í 2-0 á 15. mínútu og skoraði einnig sigurmarkið úr vítaspyrnunni.

Aaron Keller jafnaði metin í 1-1 á 13. mínútu og Oliver Batista Meier jafnaði metin í 2-2 á 52. mínútu.

Düsseldorf vann þarna sinn annan deildarleik í röð og komst fyrir vikið upp í þriðja sæti deildarinnar.

Liðið byrjaði tímabilið vel en gekk síðan illa að landa sigrum í jólamánuðinum. Liðið er einu stigi á eftir Hamburger SV sem er í öðru sæti og á líka leik inni. Köln er síðan í efst sætinu með 37 stig eða fjórum stigum meira en Düsseldorf.

Jón Dagur Þorsteinsson sat allan tímann á bekknum þegar lið hans Hertha Berlin tapaði 2-0 á útivelli á móti Regensburg. Hertha Berlin er í tólfta sæti deildarinnar eftir sinn annan tapleik í röð.