„Vil að menn spili eins og hver leikur sé sá síðasti á ferlinum“

Liðið missti línumanninn Arnar Frey Arnarsson í meiðsli í æfingaleikjunum við Svíþjóð á dögunum og svo er enn óvissa með Aron Pálmarsson en hann á að hvíla í riðlakeppninni vegna meiðsla í kálfa.

„Aron lítur betur út en planið er óbreytt. Hann er jákvæður sem og við. Svo er gott teymi sem metur stöðuna á honum. Auðvitað eru þetta varúðarráðstafanir hjá okkur og hans vegna setjum við fókusinn á milliriðilinn hjá honum. Mér finnst þetta hafa verið betra og get því æft með þeim mönnum sem eru til taks núna. Það verður svo fínn styrkur að fá Aron inn.“

Fyrsti leikurinn í riðlinum er gegn Grænhöfðaeyjum, sá næsti gegn Kúbu og lokaleikurinn gegn Slóveníu. Ísland á að vinna fyrstu tvo leikina en þriðji leikurinn verður hörkuleikur. Snorri vill ekki sjá að leikmenn ætli sér að taka því rólega í byrjun móts.

„Fyrir mér snýst þetta um næsta leik. Ég vil bara sjá gríðarlega einbeitt lið með blóð á tönnunum. Ég vil að menn spili eins og hver einasti leikur sé síðasti leikur ferilsins. Mér finnst allt annað henta okkur mjög illa. Þar fyrir utan er ekkert framhald ef við erum ekki eins og menn í fyrsta leik. Mér finnst mikilvægt að vinna leikinn með góðri frammistöðu.“

Sem fyrr er mikils vænst af íslenska liðinu á mótinu en hvaða væntingar hefur þjálfarinn?

„Ég er með hellings væntingar. Ég veit að þetta er þreytt en mér líður fáranlega vel með að taka þetta í skrefum. Mér finnst það henta okkur sem liði. Það vita allir hvað það gerir fyrir okkur að vinna riðilinn. Til að það verði að veruleika þarf að vinna alla leikina í riðlinum,“ segir Snorri Steinn en hvaða breytingar munum við sjá á leik liðsins frá síðasta stórmóti?

„Ég vil sjá að við séum að mjaka okkur í áttina að því sem ég vil. Ég vil sjá hraða, hlaup og skora mikið úr hraðaupphlaupum. Það er eitthvað sem tekur tíma og þarf að gerjast. Það er vont að geta ekki æft þetta á hverjum degi. Ég viðurkenni það. Mér fannst vanta flæði og flot í sókninni á síðasta móti. Ég hef séð vísi af þessu en þetta er áframhaldandi vinna. Mér líður vel og finnst glitta í það sem ég vil sjá.“

Fleira kemur fram í viðtalinu sem má sjá í spilaranum.

Leikur Íslands og Grænhöfðaeyja er klukkan 19:30 í kvöld. Strákunum okkar verður fylgt vel á eftir á Vísi, Stöð 2 og Bylgjunni fram að og eftir leik.