Úti­lokar ekki að Ómar Ingi verði með á HM

Ómar Ingi sneri sig illa á ökkla í sigri Magdeburg á Bietigheim á sunnudaginn. Hann var borinn af velli og í dag greindi Magdeburg frá því að hann yrði frá næstu þrjá mánuðina. Samkvæmt því er HM úr sögunni hjá Selfyssingnum.

„Ég vissi svo sem alveg í hvað stefndi. Ég heyrði strax í honum eftir að þetta gerðist og var líka í sambandi við hann í gær. Hakan fór ekkert í gólfið þegar niðurstaðan kom. Það segir sjálft að þetta er högg og leiðinlegt en ekkert við því að gera. Þetta er bara gangur leiksins og getur gerst,“ sagði Snorri Steinn í samtali við Vísi í dag.

„Það er ekkert leyndarmál að Ómar er búinn að vera í öllum þeim landsliðshópum sem ég hef valið og er lykilmaður. Ég hef viljað hafa hann sem lykilmann og hann kemur fyrir í mörgum vangaveltum. Auðvitað þarf ég að hugsa þetta eitthvað upp á nýtt. Viggó [Kristjánsson] er líka alltaf búinn að vera með okkur og hefur reynst mér og liðinu frábærlega. Ég er alveg rólegur hvað það varðar en auðvitað er þetta alltaf missir. En að því sögðu ætla ég ekki alveg að útiloka hann.“

Bíddu, bíddu. Koma þá fleyg orð Lloyds Christmas upp í hausinn: Ertu að segja mér að það sé séns?

„Þetta er tiltölulega nýskeð og undraverðir hlutir geta gerst. Hann verður pottþétt ekki í hópnum sem ég tilkynni fyrst. Það getur allt gerst. Batinn getur verið svo mismunandi,“ sagði Snorri Steinn.

„Okkar læknar eiga eftir að skoða myndirnar og allt þetta. Þetta er enn nýskeð.“

Hvort sem Ómar verður með eða ekki, þá breyta meiðsli Ómars landslaginu aðeins fyrir Snorra.

„Mínar vangaveltur og pælingar um HM þurfa að snúast um eitthvað annað en Ómar núna. Auðvitað snerist þetta ekki allt um hann en það segir sig auðvitað sjálft að þegar einn besti handboltamaður í heiminum meiðist breytir það dýnamíkinni,“ sagði Snorri Steinn.

Hann á von á því að velja æfingahóp fyrir HM um miðjan desember. Landsliðið kemur svo saman til æfinga milli jóla og nýárs. Heimsmeistaramótið hefst 14. janúar og fyrsti leikur Íslands er gegn Grænhöfðaeyjum tveimur dögum seinna.

Auk Ómars og Viggós voru þrjár aðrar örvhentar skyttur í stóra HM-hópnum: Kristján Örn Kristjánsson, Teitur Örn Einarsson og Arnór Snær Óskarsson.

„Það er eitthvað sem við þurfum að skoða núna,“ sagði Snorri Steinn aðspurður hvort hann muni hafa fleiri örvhentar skyttur í æfingahópnum en ella vegna meiðsla Ómars Inga.

„Ómar og Viggó hafa virkað vel saman þrátt fyrir að vera ekki mjög ólíkir. Ég hef verið mjög ánægður með þá og gengið vel að mínu mati. Við þurfum að sjá hvað við viljum og hvernig við nálgumst þetta.“

En þótt vonin sé enn til staðar veit Snorri Steinn að meiri líkur en minni séu á því að Ómar verði ekki með á HM.

„Auðvitað veit ég hver staðan er. Það eru minni líkur en meiri en ég er ekki tilbúinn að útiloka, að því gefnu að við komumst áfram, að hann geti á einhverjum tímapunkti tekið þátt á HM.“