Arnar betur í stakk búinn en Eyjólfur og Arnar Þór

„Ég held að þetta hafi verið óumflýjanlegt. Hann var búinn að gera sitt held ég. Ég held það hafi sýnt sig á þessum tíma hans með landsliðið að það voru vissir hlutir sem voru ekki í lagi. Ég held það hafi verið óumflýjanlegt að fara í þjálfaraskipti núna,“ segir Lárus Orri í samtali við íþróttadeild.

Hareide hafi verið réttur maður þegar hann tók við en nú sé tímabært að leita annað.

„Þegar maður lítur til baka verðum við náttúrulega að þakka honum fyrir hans tíma. Hann kemur inn á mjög erfiðum tíma og var kannski það sem við þurftum á þeim tímapunkti. Við þurftum einhvern sem var með mikla reynslu, með þekkingu og virðingu í leiknum. Hann kom með það til okkar þá en eftir þetta eina og hálfa ár held ég að nú sé kominn réttur tímapunktur að skipta um þjálfara,“ segir Lárus Orri.

Nú hætti Hareide sjálfur, fremur en að honum hafi verið sagt upp. Lárus segir það skipta litlu hvernig starfslokin báru að. Þetta sé rétta niðurstaðan og nú sé komið að næsta manni í starfið.

„Ég held þetta sé rétt ákvörðun fyrir íslenska landsliðið. Eins og hefur verið talað um er þetta mjög spennandi lið sem við erum með núna og bjartir tímar fram undan. Sérstaklega ef við náum að koma einhverjum stöðugleika á varnarleikinn,“ segir Lárus Orri en hver er þá rétti maðurinn til að taka við starfinu?

Kallar eftir Arnari í starfið

„Ég horfi til Arnars Gunnlaugssonar. Ég held hann sé á flottum tímapunkti að fara í þetta starf núna. Ég held hann geti gert góða hluti þarna,“ segir Lárus.

Þorvaldur Örlygsson sagði í samtali við Vísi í gær að hann hallaðist fremur að íslenskum kosti en erlendum í starfið. Lárus segir kost við Arnar felast í þeirri reynslu sem hann hafi sankað að sér í þjálfun. Aðrir íslenskir þjálfarar sem hafa stýrt karlalandsliðinu hafi ekki gert það áður en þeir tóku við.

„Við höfum séð það í gegnum tíðina að það er ekki gott að setja þjálfara þarna inn sem eru með litla reynslu. Flottir þjálfarar eins og Arnar Þór Viðarsson, þetta var erfið staða fyrir hann út af reynsluleysi. Eyjólfur Sverrisson fór mjög reynslulítill inn í þetta, flottur þjálfari líka, en það reyndist þeim erfitt,“ segir Lárus Orri.

Reynslan sé meiri hjá Arnari

Arnar Þór stýrði landsliðinu frá 2020 til 2023 og vann sex leiki af 31. Hann hafði áður stýrt Cercle Brugge í hálfa leiktíð, auk þess sem hann stýrði U21 árs liðum bæði Cercle og Lokeren og U21 árs landsliði Íslands.

Eyjólfur var landsliðsþjálfari 2006 til 2007 og vann tvo leiki af 14. Hann hafði aðeins þjálfað U21 árs landslið Íslands áður en hann tók við A-landsliðinu.

Til samanburðar hefur Arnar Gunnlaugsson verið þjálfari Víkings frá 2018 og stýrt liðinu til tveggja Íslandsmeistaratitla og fjögurra bikartitla. Liðið er einnig að blómstra í Evrópukeppni undir hans stjórn.

„Arnar er búinn að taka út sinn skóla og vinna alla þessa titla hérna. Ég held hann sé tilbúinn í þetta starf. Ég held hann eigi eftir að gera góða hluti í þessu starfi og þetta starf verði einnig stór stökkpunktur fyrir hann í enn stærri hluti,“ segir Lárus Orri.