Kostaði um­deilda færslu á síðu flokks sem hann er hættur í

Miðflokkurinn í Suðurkjördæmi hefur birt færslu á Facebook-síðu sinni, þar sem segir að Tómas Ellert Tómasson, fyrrverandi Miðflokksmaður, hafi birt þar efni um mánuði eftir að hafa sagt sig úr flokknum.

Fyrr í kvöld birtist færsla á síðunni þar sem deilt var opnu bréfi Kára Stefánssonar, forstjóra Íslenskrar erfðagreiningar, til Snorra Mássonar, oddvita Miðflokksins í Reykjavík suður. Í bréfinu sagði Kári að Snorri þyrfti að sætta sig við að vera orðinn frambjóðandi Miðflokksins, þótt honum kynni að mislíka stefnan.

„Þú ert orðinn frambjóðandi fyrir flokk sem hefur að stefnu málefni sem þér finnst hljóma illa, girtu þig nú í brók og horfstu í augu við sjálfan þig og þar með heiminn eins og hann er,“ skrifaði Kári meðal annars til Snorra.

Líta málið alvarlegum augum

Fyrr í kvöld birtist færsla á síðu Miðflokksins í Suðurkjördæmi þar sem greininni var deilt, án mikils samhengis. Aðeins var vitnað í inngang hennar og hlekk á hana deilt. 

Í nýrri færslu segir að Tómas Ellert Tómasson, sem sóttist eftir oddvitasæti Miðflokksins í Suðurkjördæmi í síðasta mánuði, hafi birt kostaða færslu á umræddri síðu. Það sé tæpum fjórum vikum eftir að hann sagði sig úr Miðflokknum og hafi gengið í kosningateymi Höllu Hrundar Logadóttur, oddvita Framsóknar í kjördæminu.

Þá er birt mynd því til staðfestingar að það hafi sannarlega verið Tómas Ellert sem birti færsluna í nafni Miðflokksins í Suðurkjördæmi.

„Miðflokkurinn í Suðurkjördæmi lítur málið alvarlegum augum. Tómas Ellert hefur verið fjarlægður af Facebook síðunni en annir í kosningabaráttu höfðu komið í veg fyrir að kjördæmafélagið gengi fyrr í málið. Miðflokkurinn treystir fólki og Tómas Ellert brást því trausti í kvöld,“ segir í færslunni.

Í færslunni er innihald bréfs Kára til Snorra rakið, en þar segir einnig að Tómas hafi ekki látið sér nægja að deila bréfinu, heldur hafi hann kostað færsluna sérstaklega til að auka dreifingu hennar. 

„Leitt er að sjá fyrrum samflokksmann til margra ára, kjörinn fulltrúa og frambjóðanda sigla undir fölsku flaggi á vettvangi þar sem hann áður gegndi trúnaðarstörfum.“

Gengst við því að hafa birt færsluna

Tómas Ellert lætur sitt ekki eftir liggja og svarar fyrrum samherjum sínum í Miðflokknum fullum hálsi, í athugasemd við færsluna. Sú athugasemd er samhljóða færslu sem Tómas birtir á sinni eigin Facebook-síðu.

„Hér var enginn að sigla undir fölsku flaggi þar sem að mér er fullkunnugt um að nafn þess aðila sem að kostar auglýsingu á FB mun sjást. Það ætti ég nú að vita hafandi kostað auglýsingar á þessari síðu í bráðum átta ár og kostað úr mínum vasa fyrir hundruðir þúsunda,“ skrifar Tómas Ellert.

Hann líti það sjálfur alvarlegum augum að hans fyrrum félagar séu „illa áttaðir“ og fylgist ekki með því sem gerist í kringum þá.

„Þingflokkurinn mætir ekki í atkvæðagreiðslur á þingi og veit ekkert hvað hefur verið samþykkt þar og ekki mættu þeir sem framboðslistann skipa í Suðurkjördæmi, einu sinni við skóflustungu á nýju Selfossbrúnni.“

„Ekki traustsins verðir“

Tómas heldur áfram og segist aðeins hafa viljað setja bréf Kára til Snorra á síðuna svo hægt væri að láta þann síðarnefnda vita af tilvist þess, þar sem svo virtist sem allt færi fram hjá Miðflokksmönnum þessa dagana. 

„[Meira að segja] að oddviti eins listans ykkar er á öndverðri skoðun við það sem þið hafið áður látið frá ykkur varðandi landbúnaðarmál þó hún sé sammála ykkur um að vera tilbúnir að selja Landsvirkjun (það hefur ekki komið leiðrétting frá ykkur varðandi það atriði á síðu viðskiptaráðs svo það heldur líklegast). Annað vakti nú ekki fyrir mér elsku ljúflingarnir mínir og krútt.“

Tómas lætur stutta eftirskrift fylgja athugasemd sinni:

„Það er nú varla hægt að bregðast trausti þess eða þeirra sem eru ekki traustsins verðir.“