Kær­leikskúla sem býr til ævin­týri og góðar minningar

Kærleikskúlan er fallegur listmunur sem Styrktarfélag lamaðra og fatlaðra gefur út í takmörkuðu upplagi á hverju ári en markmiðið með sölu hennar er að auðga líf fatlaðra barna og ungmenna. Allur ágóði rennur til starfsemi sumarbúðanna Reykjadal þar sem gleði, jákvæðni og ævintýri eru í fyrirrúmi.

„Kúla er svo sterkt form að það verður ríkjandi þegar kemur að hugmyndavinnu. Þetta form var alveg nýtt fyrir mér sem framan af vann með vef sem er í eðli sínu sléttur, tvívíður flötur,“ sagði Hildur þegar hún var spurð út í hugmyndavinnuna á bak við nýju kúluna.

„Mér datt fyrst í hug að koma lífsins tré fyrir inni í kúlunni og láta það vaxa niður og rætur og laufkrónu síðan breiðast út og fylgja hringlöguninni en ég valdi að spyrja engan hvernig hægt væri að framkvæma það í handblásinni glerkúlu svo niðurstaðan var sú að nota melablómið sem er eitt af okkar algengu vorblómum þótt fólk taki sjaldnast eftir þeim þar sem þau dreifa sér um gróðursnauða og hrjóstruga mela.

Við byrjum oft með hugmyndir sem eru svolítið flóknar og skila samt ekkert meiru til viðtakandans heldur en einfaldar og blátt áfram lausnir. Þetta verkefni snerist ekki um mínar pælingar varðandi tilgang lífsins eða náttúruvá heldur skyldi það fremur vera skilaboð sem myndu gleðja um jólaleytið, hvetja til samstöðu og náungakærleiks.“

Hugmyndin um melablómið á rætur sínar að rekja til sumarbústaðarferðar haustið 2023. „Á morgnana fór ég út í móann og leitaði að jurtum meðan systir mín hitaði kaffið og dró svo jurtirnar með pensli og bleki á hríspappír. Ég fann þetta hvíta litla blóm úti í móanum, fífur líka, kornsúrur og geldingahnappa en litla hvíta blómið varð uppáhaldið mitt þótt svo ég hefði aldrei tekið eftir því fyrr. Þegar ég fór svo að gramsa í skissum sem ég átti frá haustinu kom hvíta blómið helst til greina til að nota á Kærleikskúluna því það var nógu lítið til að komast þar fyrir.“

Grasafróð dóttir hennar fann svo nafn blómsins með því að skoða teikninguna. „Melablóm heitir það“, sagði hún. „Svo fór ég að lesa mér til um melablómið og allt féll þetta í réttan farveg. Þetta látlausa blóm sem stráir sér um melana þar sem fátt annað vildi vaxa minnti mig svolítið á okkur mannfólkið á þeim stundum þegar við erum ein að berjast áfram og hve ómetanlegt það er þá að fá örlítinn skilning og smá ástúð og oft nægir þetta til að komast yfir næsta lífsins hjalla eða öldufall. Svo þetta urðu einkunnarorðin á kúlunni þetta árið - blóm og ást þurfa næringu.“

Reykjadalur er uppáhalds staður svo margra, staður til þess að eignast vini og lenda í ótrúlegum ævintýrum. Þar koma saman fötluð börn og ungmenni en síðasta sumar tókum við á móti um 400 gestum. Hvort sem það er kvöldvaka, sundferð, óvissuferð eða fjársjóðsleit í Mosfellsdalnum þá er alltaf gaman bæði hjá gestum og starfsfólki. Kærleikskúlan er mikilvæg sumarbúðunum því með ágóðanum getum við bætt aðstöðuna og lent í enn fleiri ævintýrum. Andrea Rói Sigurbjörns, forstöðumaður Reykjadals.

Hildur Hákonardóttir (f. 1938) hefur á löngum starfsferli tekið á málefnum samtíma síns, einkum umhverfis- og jafnréttismálum og nýtt til þess fjölbreytta miðla. Hún lærði myndvefnað við Myndlista- og handíðaskóla Íslands 1964-68 og Listaskóla Edinborgar árið 1969 og starfaði sem skólastýra Myndlista- og handíðaskólans á árunum 1975-78.

Yfirlitssýning hennar Rauður þráður hlaut Íslensku myndlistarverðlaunin árið 2024 og Hildur hlaut fálkaorðuna 2024 fyrir framlag sitt til myndlistar og störf í þágu kvennabaráttu.

Kærleikskúlan er seld á tímabilinu 5.-20. desember 2024 á vef Styrktarfélags lamaðra og fatlaðra og hjá söluaðilum um land allt.

Kærleikskúlan er á samfélagsmiðlunum Facebook og Instagram.