Orri kom inn á í sigri í Anda­lúsíu

Landsliðsframherjinn Orri Óskarsson varð að sætta sig við að spila tíu mínútur í kvöld þegar lið hans Real Sociedad vann góðan 2-0 útisigur gegn Sevilla í spænsku 1. deildinni í fótbolta.

Japaninn Takefusa Kubo kom gestunum yfir á 34. mínútu og Mikel Oyarzabal bætti seinna markinu við úr vítaspyrnu á 68. mínútu.

Orri kom svo inn á fyrir Oyarzabal á 80. mínútu.

Sigurinn kemur Real Sociedad upp um fjögur sæti, í efri hluta deildarinnar. Liðið er nú í 10. sæti með fimmtán stig, fyrir ofan Sevilla og Girona vegna betri markatölu.