Fram­kvæmdir á Laugar­dals­velli: Sex vikur frá sáningu í full­kominn völl

Til stendur að setja hybrid gras á völlinn með undirhita og hefur nú þegar verið grafið fyrir nýjum leikfleti vallarins sem verður staðsettur nær nýlegri og stærri stúku vallarins. Aðeins rétt rúmar tvær vikur hafa liðið frá fyrstu skóflustungu á vellinum og undanfarið hafa verktakar frá SIS Pitches, sem sérhæfa sig í uppbyggingu sambærilegra valla, verið að störfum í Laugardalnum og er góður gangur í þeirra vinnu. Fyrsta fasa fyrsta verkhluta lýkur í desember og svo er stefnt að því að sá í völlinn í mars á næsta ári.

Bjarni Hannes­son, gras­valla­tækni­fræðingur, er KSÍ til halds og trausts í þessu verk­efni og hann segir það vel ger­legt að spila leik á vellinum í júní. Honum lýst af­skap­lega vel á verk­efnið.

„Þetta er of­boðs­lega spennandi fyrir svona gras nörd eins og mig. Bara eins og fyrir hvern sem er, í hvaða fagi sem er, að fá flottustu og nýjustu tækni til sín. Þá er þetta af­skap­lega spennandi. Þetta er nauð­syn­legt skref. Við erum mjög spenntir og þetta gengur mjög vel. Þetta verk er í góðum höndum. Fram­kvæmda­aðilinn, SIS Pitches, eru mjög færir í því sem að þeir eru að gera. Byggja velli út um allan heim, við alls konar aðstæður. Ekki bara á heitum svæðum, heldur einnig á mjög köldum svæðum og eru því vanir öllu.“

En er það alveg ger­legt að halda úti hybrid velli á köldu svæði eins og Ís­landi?

„Já. Við þekkjum okkar bestu vini í Noregi. Rosen­borg hefur spilað Evrópufót­bolta frá nítján hundruð níutíu og eitt­hvað og unnið þar lið eins og Manchester United á sínum heima­velli og eru á sömu breiddar­gráðu og við í Reykja­vík. Það er meira segja kaldara þar heldur en hér. Það er ekkert vanda­mál. SIS ræktuðu til að mynda vellina fyrir Rúss­land sem dæmi þar sem að þeir sáðu í vellina í janúar og febrúar í mínus átján gráðum. Að spila á köldum svæðum er engin nýlunda. Við Ís­lendingar erum ekkert kaldari heldur en önnur svæði.“

En hver eru lykil­at­riðin sem verða að vera til staðar fyrir svona völl?

„Undir­hitinn er lykillinn að þessu öllu saman. Það er undir­hiti þannig að við getum stillt hita­stigið, á því svæði sem við viljum hita, eins og við viljum hafa það. Síðan er dúka­notkun mikilvæg sem og hvernig við viðhöldum svæðinu. Ég ætla ekki að drepa fólk úr leiðindum með ein­hverjum af­skap­lega miklum fræðum. Við getum haldið völlunum gangandi þokka­lega vel. Og kannski sér­stak­lega með hybrid vellina þá helst yfir­borðið þétt, leik­menn fá grip alltaf, eru ekki að renna til. Þannig getum við spilað við allar aðstæður. Ef við viljum láta gras vaxa hérna þá þurfum við ljósa­búnað og þess háttar. En miðað við það leikjaálag sem gert er ráð fyrir á þessum velli þá munum við ráða við þetta auðveld­lega eins og þetta er.

Ef við værum að spila leiki í deildar­keppni hérna seint í nóvember til mars, eins og er spilað í Þýska­landi og fleiri stöðum á köldum svæðum, þá myndirðu vilja vera með þannig búnað. Auðvitað getur það gerst að það verði fullt af leikjum hérna. Við sjáum hvað er að gerast í ís­lenskri knatt­spyrnu í dag. Stelpurnar okkar og strákarnir eru að komast lengra og lengra inn í Evrópu­keppnirnar. Það geta náttúru­lega orðið fullt af leikjum hérna. En eins og staðan er í dag teljum við að völlurinn muni ráða vel við það álag sem er fram undan.“

Golfvalla geirinn hlær

En kostnaðurinn varðandi búnað sem þarf til þess að sjá um svona völl. Er hann mikill?

„Nei alls ekki. Golf­valla geirinn eigin­lega hlær af því sökum þess að þeir eru með tækja­búnað sem er svona átta til tíu sinnum dýrari heldur en gengur og gerist í þeim búnaði sem er á meðal fót­bolta­velli. Þetta þurfa bara að vera grunn tæki og tól til að viðhalda vellinum. Svo snýst þetta aðal­lega um rétta meðhöndlun varðandi dúka og undir­hita. Notkun dúka og undir­hita er jafnan góð leið til þess að drepa gras. En í réttum höndum og með réttri þekkingu er þetta frábært tæki til þess að búa til flott gras.

Eins og fyrr sagði er stefnt að því að sá og sauma í Laugar­dals­völlinn í mars á næsta ári. Það tekur aðeins nokkrar vikur frá sáningu þar til að völlurinn verður full­kom­lega leik­hæfur.

„Við erum venju­lega í kringum sex vikur frá sáningu í full­komið yfir­borð við þessar aðstæður. Við sjáum bara alltént fót­bolta­velli í ensku úr­vals­deildinni sex vikna gamla þegar byrjað er að spila á þeim. Að vísu er heitara þar úti en munið að of mikill hiti er ekki endi­lega gott. Þú vilt ekki vera mikið yfir tuttugu gráðunum sem dæmi. Stundum er því að hægja á sáningunni hjá þeim sökum of mikils hita. Hér getum við stillt okkur inn í það hita­stig sem við viljum og ættum að geta náð og spilað frábæra leiki í byrjun næsta tíma­bils.“

Þannig að þú ert bjartsýnn á að hér verði spilað í júní næst­komandi?

„Já við gerum okkar allra allra besta. Það getur náttúru­lega allt gerst í öllu eins og gengur og gerist en við erum hérna til þess að gera þetta klárt fyrir þetta. Það er mark­miðið og við ætlum að standa við það.

Er eitt­hvað sem gæti hamlað því að áætlanir gangi eftir?

„Ef við lendum í ein­hverju of­boðs­legu lægar tíma­bili í maí. Segjum að það gangi hérna yfir stormur eftir storm eftir storm. Þá flækir það hlutina pínulítið en ef við lendum í maí mánuði með sjö gráðu hita­stigi að meðaltali og blöndum inn í það dúkum og undir­hita sem og góðu ljósi af náttúrunnar hendi. Þá á þetta að ganga vel því.“