Sölu­hagnaður af ó­lög­legri sjónvarpssölu elds­neyti glæpa­hópa

Með ólöglegri sjónvarpsþjónustu er átt við aðila sem stela efni frá rétthöfum og selja áfram til þriðja aðila, á umtalsvert lægra verði. Í sumar var athafnamaður á Spáni dæmdur í 60 daga skilorðsbundið fangelsi fyrir að hafa selt fólki aðgang að læstri dagskrá sjónvarpsstöðva í gegnum streymisveitu sína. 

Þeim fer ört fjölgandi sem nýta sér slíka þjónustu en það er unga fólkið sem keyrir upp aukninguna. Könnun frá því í maí sýnir að þrjátíu prósent Íslendinga nýti sér slíkt.

„Þetta eru mjög háar tölur og það er ekkert fyrirtæki í dag sem myndi sætta sig við það í rekstri,“ segir Kristjana Thors Brynjólfsdóttir þróunarstjóri sjónvarpslausna hjá Sýn.

Fréttir voru sagðar af þjófnaði úr matvöruverslunum í sumar en árleg óútskýrð rýrnun er metin á bilinu eitt til eitt og hálft prósent.

„Það er ekki ásættanlegt en við erum að tala um 30%“

Skaðinn hlaupi árlega á tugum milljóna ef ekki hundrað og komi illa niður á skapandi geiranum og þýði í raun færri innlend framleiðsluverkefni. Nú sé brýnt að breyta viðhorfi fólks því kaup á ólöglegri sjónvarpsþjónustu jafngildi kaupum á annars konar þýfi.

„Það er það sem okkur finnst svo skrítið, af hverju fólki finnst bara í lagi að vera að neita og kaupa stolna vöru.“

Nýir neytendur ólöglegs efnis 400 þúsund í fyrra

Stian Løland, fer fyrir samtökum Nordic Content Protection sem samanstendur meðal annars af fyrrverandi lögreglumönnum og lögfræðingum. Þau veita sjónvarpsstöðvum ráðgjöf, rannsaka sakamál og gefa skýrslu fyrir dómi. Fulltrúar NCP eru staddir á Íslandi en þeir sóttu, ásamt fleiri fyrirlesurum, á dögunum ráðstefnu í húsakynnum Sýnar um ólöglega sjónvarpssölu.

„Í fyrra er talið að á Norðurlöndunum hafi fjöldi nýrra neytenda ólöglegs efnis numið 400 þúsundum,“ segir Stian.

Það sé afhjúpandi að elta peningaslóð starfseminnar.

„Hægt var að sjá hvernig fé frá ólöglegri sölu sjónvarpsefnis kynti undir önnur form skipulagðrar glæpastarfsemi. Þetta er því gífurlegur vandi sem við viljum upplýsa almenning um. Þegar fólk greiðir fyrir slíka þjónustu, styður það ekki lögmæta sjónvarpsstöð heldur kyndir maður undir skipulagða glæpastarfsemi.“

Þess skal getið að Stöð 2, Vísir og Bylgjan er í eigu Sýnar.