Raygun þykir þetta mjög leiðin­legt

Raygun kom sjálfri sér og breikdönsum sínum til varnar í viðtalinu og telur að öll gagnrýnin sem dundi yfir hana sé að mestu til komin vegna þekkingarleysis á íþróttinni.

Gunn, sem er 37 ára gamall háskólakennari, tapaði öllum þremur breikdansbardögum sínum og það samanlagt 54-0. Breikdans var í fyrsta sinn keppnisgrein á Ólympíuleikum.

Það er óhætt að segja að óvenjulegar æfingar hennar hafi gert hana af einum frægasta og eftirminnilegasta keppanda leikanna. Hún fékk aftur á móti margar háðglósur á netinu og margir gerðu grín að sérstökum æfingum hennar.

Get ekki stjórnað því hvernig fólk bregst við

„Ég held að árangur minn tali sínu máli. Ég var efsta ástralska konan í breikdansi árin 2020, 2022 og 2023. Árangurinn minn segir því sína sögu en svo getur auðvitað allt gerst í keppni,“ sagði Raygun.

Henni þykir miður að frammistaða hennar hafi kallað fram alla þessa neikvæðni og allt þetta hatur.

„Mér þykir mjög leiðinlegt allt þetta bakslag sem breikdansheimurinn hefur þurft að þola en ég get ekki stjórnað því hvernig fólk bregst við,“ sagði Raygun.

„Því miður þurfum við bara meiri fjárhagslegan stuðning hér í Ástralíu til að eiga möguleika á því að eignast heimsmeistara,“ sagði Raygun.

Aldrei æft eins mikið

„Ég hef aldrei æft eins mikið og á síðasta ári. Líkaminn minn mátti þola ýmislegt og ég gaf allt mitt í þetta. Ef það er ekki nógu gott fyrir einhvern, hvað get ég þá sagt,“ sagði Raygun.

„Það var virkilega leiðinlegt að sjá hversu mikið hatur þetta kallaði fram. Langmest af þessum viðbrögðum kom frá fólki sem þekkir hvorki breikdansíþróttina né ólíkar aðferðir keppenda,“ sagði Raygun.

„Öll þessi neikvæða orka og öll napuryrðin frá fólki voru samt mjög sláandi fyrir mig,“ sagði Raygun. 

Sumir komu því að stað að hún hefði svindlað sig inn á Ólympíuleikana. Það var settur á stað undirskriftarlisti á netinu því tengdu þar sem fimmtíu þúsund manns skrifuðu undir.

Ömurlegar samsæriskenningar

„Samsæriskenningarnar voru alveg ömurlegar. Það var mjög óþægilegt af því að það var ekki aðeins fólk sem þekkir ekki íþróttina eða fólk sem var ósátt með frammistöðu mína. Þetta var fólk sem var að ráðast á okkar orðspor og okkar heiðarleika. Ekkert átti þetta heldur stoð í raunveruleikanum,“ sagði Raygun.

„Fólki trúir enn ekki sannleikanum en því miður er það bara hluti af okkar veruleika í dag,“ sagði Raygun.