Sjáðu Jason Daða opna marka­reikninginn sinn í enska boltanum

Markið skoraði Jason á 47. mínútu leiksins og kom Grimsby í 2-0. Liðið vann leikinn á endanum 2-1.

Knattspyrnustjórinn David Artell hrósaði marki Jasonar Daða eftir leikinn en það kom eftir hraða sókn upp hægri kantinn. Kieran Green gerði þá mjög vel í að snúa á varnarmann og keyra upp kantinn.

Jason fékk á boltanum í teignum, lék laglega á varnarmann og sendi hann síðan fram hjá markverðinum sem steig í vitlausan fót og átti enga möguleika.

Jason yfirgaf Breiðablik á miðju tímabili og hafði ekki náð að skora í fyrstu þremur keppnisleikjum sínum með Grimsby, tveimur í deild og einum í deildabikar.

Nú kom markið og Jasoni var fagnað vel af liðsfélögum sínum. Markið skipti líka miklu máli í lokin þegar Bradford náði að minnka muninn. Grimsby fagnaði sínum öðrum deildarsigri og situr í ellefta sæti töflunnar.

Það má sjá markið hans Jasonar Daða hér í svipmyndum frá leiknum hér fyrir neðan.

Markið kemur eftir rúma mínútu en sóknin hefst þegar 1:07 eru búnar af myndbandinu.