Hinn grunaði ó­gæfu­maður sem í­búar höfðu á­hyggjur af

Lögreglan á Austurlandi fékk á fimmtudag útkall vegna hjóna sem fundust látin í heimahúsi í Neskaupstað. Hinn grunaði í málinu, Norðfirðingur á fimmtugsaldri, ók bíl hjónanna suður til Reykjavíkur. Frá því að lögreglu barst tilkynningin um málið leið ekki nema ein og hálf klukkustund þar til hinn grunaði var handtekinn við Snorrabraut. Þar skipti máli að lögreglan gat skoðað ferðir mannsins í eftirlitsmyndavélum á hringveginum. 

Fjallað var um málið í kvöldfréttum okkar á föstudag, farið yfir atburðarásina og rætt við fólk á svæðinu.

Á föstudag féllst Héraðsdómur Reykjavíkur á vikulangt gæsluvarðhald og einangrun yfir manninum. 

Kristján Ólafur Guðnason yfirlögregluþjónn fyrir austan segir að unnið sé eins hratt og hægt sé úr þeim gögnum sem lögreglan hafi aflað og sé í raun enn að afla. Hún muni taka ákvörðun um hvort lengra gæsluvarðhald þurfi til þegar nær dregur föstudegi.

„Rannsókninni miðar vel, ennþá er verið að afla gagna og ræða við vitni. Sú vinna er í gangi núna. Það er búið að taka skýrslu af hinum grunaða en það er ekki hægt að fara út í það hvað út úr því kom að sinni, í það minnsta,“ segir Kristján Ólafur.

Það hefur ekki komið fram játning enn eða hvað?

„Ég get ekkert sagt um það að sinni.“

Síðast þegar við töluðum saman voruð þið að reyna að komast að því hver tengsl hins grunaða í málinu voru, eruð þið einhverju nær?

„Rannsóknin miðar að því ennþá að reyna að átta sig á þeim þætti og það er ekki að sjá, í það minnsta en sem komið er, að þau tengsl hafi verið mjög mikil eða djúp.“

Kristján segir að eitt af því sem enn sé til rannsóknar sé hvert banamein hjónanna hafi verið. Það muni skýrast í vettvangsvinnu sem enn stendur yfir og þá muni niðurstöður krufninga berast fljótlega.

Hinn grunaði óreglumaður

Fréttastofa var í Neskaupstað á föstudag þar sem gríðarlega mikil sorg ríkir og átti nokkur samtöl við bæjarbúa en nokkrir þeirra sögðust hafa haft áhyggjur af ástandi hins grunaða í málinu í nokkurn tíma. Hann væri óreglumaður sem hefði verið í neyslu árum saman. 

Húsbruni í febrúar

Samkvæmt heimildum fréttastofu kom upp eldsvoði í húsi í hans eigu í Neskaupstað í febrúar á þessu ári en hann var í húsinu þegar eldurinn kom upp. Lögregluyfirvöld hafa frá því hið alvarlega mál kom upp á fimmtudag ekki viljað tjá sig um brunann. Hér í viðhengi er hægt að lesa nánar um eldsvoðann í frétt Austufréttar frá því í febrúar.