„Snýst um að ég fái að sitja í sófanum eftir tíu ár að horfa á þessa snillinga“

Anton á í geymslu sinni ýmsa gripi frá fyrri Ólympíuleikum en nú þegar styttist í að ferlinum ljúki vill hann leyfa öðrum að njóta góðs af. Hann sýndi gullsímann og fleira á samfélagsmiðlum sínum og ætlar að draga út sigurvegara en einnig svara ungum iðkendum sem einn daginn gætu komist á stærsta svið íþróttanna.

„Ástæðan fyrir því að ég er að gefa þetta er til þess að geta hvatt næstu kynslóð áfram. Þetta voru síðustu leikarnir mínir og ég vil geta veitt öðrum innblástur til að þora að dreyma og stefna langt, og hafa þá eitthvað til að minna sig á hver markmið þeirra eru, og reyna að fylgja þeim eftir. Þetta snýst um að ég fái að sitja í sófanum eftir tíu ár að horfa á þessa snillinga gera eitthvað flott á svona leikum.“

Allt of heitt í ólympíuþorpinu

Á meðal þess sem Anton ætlar að gefa er sæng sem allir keppendur fengu, sem hann gat þó aldrei notað. Umhverfisverndarsjónarmið réðu því að herbergin í ólympíuþorpinu voru illa loftkæld.

„Ég notaði aldrei þessa sæng því það var allt of heitt inni í ólympíuþorpinu. Mótshaldarar sköffuðu enga innbyggða loftkælingu. Við fengum reyndar einhverjar græjur en þær virkuðu ekki eins og maður vonaðist til,“ segir Anton brosandi.

Hann bjó til léttan leik á TikTok til að gefa ólympíuvörurnar og viðbrögðin létu ekki á sér standa: „Ég þarf að fara í gegnum helling af skilaboðum. Ég mun ekki ná að gefa öllum varning en að minnsta kosti sent baráttukveðjur.“

Anton flutti formlega heim til Íslands í gær, eftir að hafa sótt búslóðina til Bandaríkjanna, og býr hjá móður sinni í Hafnarfirðinum fyrst um sinn. 

Núna tekur við nýtt og öðruvísi líf, þó að Anton ætli sér að keppa á einu stórmóti til viðbótar; HM í 25 metra laug í Búdapest í desember.

Nýtt líf hafið og ferlinum lýkur á HM í Búdapest

„Það var áhugavert að klára leikana og fara svo beint til Bandaríkjanna, ná í búslóðina og hundinn, og flytja allt lífið til Íslands. Það er bæði ótrúlega spennandi og líka áhugaverð kaflaskil.

Núna mun sundið ekki hafa fyrsta sætið í lífinu lengur. Maður er búinn að lifa sem atvinnusundmaður síðustu 4-5 árin og nú er nýtt líf að taka við sem ég er ótrúlega spenntur fyrir. Ég er að byrja að vinna hjá HS Orku og hlakka til að láta til mín taka þar. Sundið er ekki alveg búið, ég ætla að halda aðeins áfram og vera í því út desember. Leyfa því að fjara út í stað þess að hætta allt í einu,“ segir Anton.

„Ég byrja á að æfa út september og vonandi smellur þetta allt saman. Ég bý að rosalegri vinnu fyrir Ólympíuleikana og er enn í fantaformi þannig að ég þarf ekki endilega að bæta neinu við, heldur bara viðhalda. Fá svo bara að klára sundferilinn í Búdapest [á HM í desember]. Það er kominn tími á aðra hluti í lífinu.“