Réðst inn á hjúkrunar­heimili móður sinnar og drap sex

Guardian hefur þetta eftir yfirvöldum í Króatíu, þar sem segir að fimm hinna látnu hafi verið íbúar á hjúkrunarheimilinu og einn verið starfsmaður þess. 

Þá kemur fram að maðurinn hafi flúið vettvang þegar hann hafði hleypt skotunum af. Lögregla hafi handtekið hann á kaffihúsi í bænum og fundið í fórum hans skotvopn sem hann hefði ekki leyfi fyrir.

Samkvæmt upplýsingum frá lögreglu hefur maðurinn áður komist í kast við lögin, vegna heimilisofbeldis og fyrir að rjúfa almannafrið. Glæpir af þessu tagi séu sjaldgæfir í landinu og árásin ein sú mannskæðasta í sögu Króatíu. 

Króatískir miðlar hafa borið kennsl á árásarmanninn og segja hann fyrrverandi lögreglumann sem barðist í sjálfstæðisstríði Króatíu á tíunda áratugnum. Ekki liggur fyrir hver kveikjan að árásinni var.