Mikill meiri­hluti lands­manna mót­fallinn sjókvíaeldi

Í helstu niðurstöðum kemur fram að 65,4 prósent eru neikvæð gagnvart sjókvíaeldi en 13,9 segjast jákvæð. Tæp sextíu prósent vilja ganga svo langt að banna sjókvíaeldi og þá telja tæp 62 prósent velferð eldislaxa í sjókvíaeldi slæma. Andstaðan hefur ekki mælst hærri í könnunum Gallups, fleiri vilja bann en áður og þessi nýja spurning um velferðarvandann í sjókvíaeldi sýnir að fólk er orðið vel meðvitað um að þá skuggahlið iðnaðarins.

Þetta segir Jón Kaldal en könnunin er unnin að ósk Íslenska náttúruverndarsjóðsins. Úrtak könnunarinnar var 1948, fjöldi svarenda var 915 sem þýðir að þátttökuhlutfall mælist 47 prósent. Könnunina má finna í viðtengdum skjölum hér neðar.

Jón telur engan vafa leika á um að staða baráttu gegn laxeldi í opnum sjókvíum sé ótrúlega sterk. En óttast hann ekki að þeir sem eru hlynntir sjókvíaeldi muni afskrifa niðurstöðurnar á altari þess að könnunin er gerð að undirlagi Íslenska náttúruverndarsjóðsins.

„Nei. Ég hef engar áhyggjur af því. Gallup vinnur könnunina eftir sinni viðurkenndu vísindalegu aðferðarfræði. Því til viðbótar hafa önnur könnunarfyrirtæki líka kannað afstöðu þjóðarinnar í þessum efnum að eigin frumkvæði og niðurstöðurnar nánast eins. Fjórum til fimm sinnum fleiri eru á móti þessum skaðlega iðnaði en styðja hann,“ segir Jón.

Í könnuninni má lesa ríka andstöðu við sjókvíaeldi:

Andstaðan við sjókvíaeldi er afgerandi

- í öllum aldurs- og tekjuhópum

- meðal karla og kvenna

- í öllum kjördæmum

- meðal kjósenda allra flokka

Afstaða greind eftir flokkapólitík

Neikvæðni í garð sjókvíaeldis er yfir 50 prósent meðal stuðningsfólks allra flokka nema Sjálfstæðisflokks og Framsóknarflokks, en þar er þó andstaðan mun meiri en stuðningurinn:

Sjálfstæðisflokkur

• 43% neikvæð
• 22% jákvæð
• 35% hvorki né

Framsóknarflokkur

• 39% neikvæð
• 32% jákvæð
• 29% hvorki né

Mest er andstaðan meðal þeirra sem styðja Pírata og Samfylkinguna:

Píratar

• 97% neikvæð
• 0% jákvæð
• 3% hvorki né

Samfylkingin:

• 78% neikvæð
• 11% jákvæð
• 11%% hvorki né

Auglýsingaherferð SFS skilar litlu

Jón segir niðurstöðurnar sérlega gleðilegar í ljósi þess að Samtök fyrirtækja í sjávarútvegi hefur rekið nokkuð harða ímyndarauglýsingabaráttu að undanförnu.

„SFS er líklega búið að láta framleiða og birta sjónvarps- og netauglýsingar sem kosta um það bil tvöfalt það sem kostar að reka Íslenska náttúruverndarsjóðinn á ári. Ánægjulegt að fá staðfest að þjóðin sér í gegnum þennan glansmyndar áróður SFS,“ segir Jón.

• 4035840_Sjókvíaeldi_170724PDF358KB
  Sækja skjal