Fjöldi fót­bolta­fólks sýnir Palestínu stuðning

Mörg þeirra hafa birt mynd á samfélagsmiðlum sínum til stuðnings Rafah en aðrir hafa gengið enn lengra og fordæmt voðaverk Ísraelshers á svæðinu. Á sunnudag lést fjöldi Palestínumanna, þar á meðal konur og börn, þegar Ísraelsher gerði loftáráris með þeim afleiðingum að það kviknaði í flóttamannabúðum á svæðinu og fólk brann lifandi.

Svæðið áti að vera svokallað „mannúðarsvæði“ en Ísraelsher hefur beint fólki á svæðið með því loforði að það yrði ekki gerð árás á það. Það loforð reyndist innantómt miðað við þann hrylling sem hefur geisað á svæðinu síðustu daga. Þá fóru skriðdrekar Ísraelshers inn á svæðið í gær, þriðjudag.

• Sjá einnig:  Hryllingur í Rafah eftir hefndar­að­gerðir
• Sjá einnig: „Við höfum ekkert“

Meðal fótboltamanna sem hafa deilt myndinni sem sjá má hér að neðan eða þá öðrum skilaboðum þar sem fjöldamorð Ísraelshers eru fordæmd eru:

1. William Saliba, miðvörður Arsenal
2. Rafael Leão, sóknarmaður AC Milan
3. Nicolas Jackson, framherji Chelsea
4. Jules Koundé, varnarmaður Barcelona
5. Hakim Ziyech, miðjumaður Galatasaray
6. Ousmane Dembélé, framherji París Saint-Germain
7. Ibrahima Konaté, miðvörður Liverpool
8. Marcus Thuram, sóknarmaður Inter Milan
9. Aitana Bonmatí, miðjumaður Barcelona
10. Leah Williamson, miðvörður Arsenal
11. Lucy Bronze, bakvörður Barcelona
12. Dayot Upamecano, miðvörður Bayern München
13. Gianluca Scamacca, framherji Atalanta

Vert er að taka fram að listinn er ekki tæmandi. Þá hefur David Beckham, núverandi sendiherra UNICEF og fyrrverandi leikmaður Manchester United, Real Madrid, AC Milan, PSG og enska landsliðsins þar sem hann var lengi vel fyrirliði, nýtt mátt sinn á samfélagsmiðlum til að deila færslu hjálparsamtakanna UNICEF.

Deildi hann færslu UNICEF sem sjá má hér að neðan. Þar er hryllingnum á Rafah lýst, kallað eftir vopnahléi, að gíslum verði sleppt og glórulausum morðum á börnum verði hætt.

Þá hefur Eric Cantona, goðsögn hjá Manchester United, verið duglegur að lýsa yfir stuðningi við Palestínu. Hann birti nokkrar spurningar í formi ljóðs á Instagram-síðu sinni.

„Er einhver eftir til að verja þessa glæpamenn?

Er einhver eftir sem fordæmir ekki þessa glæpamenn?

Eru enn ríki sem vopna þessa glæpamenn?

Er einhver eftir sem myndi ekki kalla þetta þjóðarmorð?

Er einhver eftir sem myndi ekki fella tár yfir þessum hrylling?“

Hvort við sjáum fleira íþróttafólk stíga upp og tjá sig um málefni Palestínu verður að koma í ljós en það verður forvitnilegt að sjá hvort liðin sem höfðu hvað hæst á HM í Katar geri slíkt hið sama á EM í ár.