Sér ekki eftir ræðunni um­deildu þó móðir hans sé virtur eðlis­fræðingur

Eins og Vísir hefur greint frá þá hélt Butker ræðu við útskriftaathöfn Benedictine-háskóla í Atchison í Kansas. 

Eftir umdeild ummæli um fóstureyðingar, Covid-faraldurinn og Joe Biden, Bandaríkjaforseta, meðal annars, sneri Butker sér að konunum í salnum. Hann byrjaði á því að skjóta á söngkonuna Taylor Swift, kærustu Travis Kelce, er hann vitnaði í textabút hennar og kallaði hana „kærustu liðsfélaga.“

„Það eruð þið, konurnar, sem eruð mataðar af verstu lygunum. Sumar ykkar gætu átt farsælan feril en ég þykist vita það að meirihluti ykkar séu spenntastar fyrir hjónabandinu og börnunum sem þið munuð fæða í heiminn,“ sagði Butker einnig. 

Þessi ummæli vöktu hvað mesta athygli enda er móðir hans, Elizabeth Keller Butker, virtur eðlisfræðingur við Emory-háskólann.

Kelce hefur tjáð sig um ummælin líkt og Patrick Mahomes, leikstjórnandi liðsins. Þeir hafa báðir sagt að Butker sé góður liðsfélagi og öll þeirra kynni af honum séu að hann sé góð manneskja. 

Hvorugur sagðist hins vegar vera sammála ummælum hans á neinn hátt. Það sama á við um NFL-deildina sem hefur opinberlega gefið út að hún deili ekki skoðunum leikmannsins.

Nú loks hefur Butker tjáð sig um málið. Hann segir að hann hafi tekið ákvörðun um að halda ræðuna og segja það sem hann sagði. Hann bjóst ekki við því að fá jafn mörg hatursfull skilaboð og raun bar vitni en hann segir að flestir hafi hins vegar borið virðingu fyrir skoðanafrelsi hans.

Þó það virðist sem allir liðsfélagar hans sem og þjálfarinn Andy Reid séu ósammála þá er ekkert sem bendir til þess að Chiefs láti Butker fara. 

Að því sögðu verður fróðlegt að sjá hvernig honum verður tekið á komandi leiktíð en ljóst er að ummælin fóru öfugt ofan í marga og má reikna með að það verði enn meiri læti en vanalega þegar hann stígur upp til að sparka boltanum á milli marksúlnanna.