Hélt upp á landsliðsvalið með marki

Emilía er einn þriggja nýliða sem voru valdir í íslenska landsliðið fyrir leikina gegn Austurríki í undankeppni EM 2025. Hinir eru Katla Tryggvadóttir og Kristín Dís Árnadóttir.

Hin nítján ára Emilía á íslenskan föður en danska móður. Hún hefur leikið fyrir yngri landslið Danmerkur en hefur nú verið valin í íslenska A-landsliðið.

Emilía og stöllur hennar í Nordsjælland voru í góðri stöðu fyrir seinni leikinn gegn Næstved í dag enda unnu þær þann fyrri, 0-7.

Nordsjælland var í álíka litlum vandræðum með Næstved í dag og vann annan stórsigur, 2-10. Emilía skoraði annað mark gestanna á 50. mínútu en hún jafnaði þá í 2-2.

Emilía er markahæst í dönsku úrvalsdeildinni með tíu mörk í sextán leikjum. Nordsjælland er með tveggja stiga forskot á toppi hennar.

Í bikarúrslitaleiknum mæta Emilía og stöllur hennar Bröndby sem Kristín Dís og Hafrún Rakel Halldórsdóttir leika með. Bröndby vann AGF í gær, 3-1, og einvígið, 4-3 samanlagt.