Tiger og McIlroy hafa alltaf verið hinir mestu mátar en samkvæmt Golf Digest er sú ekki raunin lengur.
„Samband McIlroy and Woods hefur versnað mikið undanfarna sex mánuði. Það eru engin leiðindi en þeir hafa ólíka sýn á framtíð golfsins. Það hefur eitthvað komið upp á milli þeirra,“ skrifar blaðamaður Golf Digest og hefur það eftir heimildarmönnum sínum.
McIlroy verður ekki tekinn aftur inn í leikmannaráð PGA-mótaraðarinnar en Tiger ku hafa kosið gegn honum.
Tiger og McIlroy eru báðir meðal keppenda á PGA-meistaramótinu og þeir mættust á fyrsta keppnisdegi í gær. Þeir virtu hvorn annan ekki viðlits og gárungarnir voru á því að þar væri komin sönnun fyrir vinslitum kylfinganna.
McIlroy er í 5. sæti eftir fyrsta keppnisdaginn á PGA-meistaramótinu á fimm höggum undir pari, fjórum höggum á eftir forystusauðnum Xander Schauffele. Tiger er í 85. sæti á einu höggi yfir pari.
PGA-meistaramótið er í beinni útsendingu á sportrásum Stöðvar 2. Bein útsending frá öðrum keppnisdegi hefst klukkan 18:00 á Stöð 2 Sport 4.
