Á­rásin virðist hafa beinst gegn konum

Fimm af fórnarlömbunum voru konur en auk þess lést einn karlmaður í árásinni, það er öryggisvörður sem freistaði þess að stöðva árásarmanninn. 

Árásarmaðurinn var að lokum skotinn til bana af lögreglukonu, sem forsætisráðherra Ástralíu segir hafa sýnt sannkallaða hetjudáð þegar hún hljóp ein inn í verslunarmiðstöðina og stöðvaði manninn.

Árásarmaðurinn hét Joel Cauchi og var 40 ára gamall.

Faðir hans hefur greint frá því í fjölmiðlum að Cauchi hafi átt við andlega erfiðleika að stríða og nýlega hætt að taka lyfin sín. „Fyrir ykkur er hann skrýmsli. Fyrir mér var hann afar veikur drengur,“ sagði Andrew Cauchi.

Spurður að því hvers vegna sonur hans hefði beint sjónum sínum að konum sagði Andrew hann hafa langað í kærustu en skort félagslega færni og verið frústreraður vegna þessa.

Eitt fórnarlamba Cauchi, Ashlee Good, lést þegar hún freistaði þess að verja níu mánaða gamla dóttur sína frá Cauchi. Stúlkan særðist og þurfti að gangast undir aðgerð en er sögð á batavegi.

Fyrir utan þá sem léstust særðust tólf í árásinni sem þurfti að leggja inn á sjúkrahús. Fjórir hafa verið útskrifaðir en átta liggja enn inni, í mis alvarlegu ástandi.

BBC greindi frá.