Sam Hew­son yfir­gefur Þrótt

Frá þessu greindi Kristján Kristjánsson, formaður knattspyrnudeildar Þróttar, á stuðningsmannasíðu félagsins á Facebook. Þar segir að félagið og Sam Hewson hafi skrifað undir starfslokasamning.

Hewson hefur leikið með Þrótti síðan 2021 en þá gekk hann í raðir félagsins sem spilandi aðstoðarþjálfari. Hann fór með liðinu niður í 2. deild þar sem hann skoraði 11 mörk í 17 leikjum er liðið flaug aftur upp í Lengjudeildina.

„Hann hefur verið mikilvægur fyrir okkur, fært okkur reynslu og baráttukraft en líka glímt við meiðsli á löngum köflum. Ákvörðun um starfslok er sameiginleg og við þökkum Sam fyrir hans framlag til Þróttar og óskum honum velfarnaðar í framtíðinni,“ segir Kristján einnig í yfirlýsingu á stuðningsmannasíðu Þróttar.

Hinn 35 ára gamli Sam Hewson – sem er uppalinn hjá Manchester United - hefur spilað hér á landi síðan 2011 þegar hann samdi við Fram. Síðan þá hefur hann leikið með FH, Grindavík, Fylki og nú síðast Þrótti.