Þing­maður VG biðlar til Bjarna sem ráði al­farið ferðinni

Þetta kemur fram í Facebook-færslu Brynhildar sem tók í lok árs 2023 sæti á þingi vegna veikinda Svandísar Svavarsdóttur.

„Ég skora á utanríkisráðherra að gera það sem þarf til að sækja fólkið okkar á Gaza,“ segir Brynhildur. Áskorun hennar fellur ekki vel í kramið hjá fjölmörgum sem hafa kallað eftir viðbrögðum stjórnvalda í málinu og telja má á vinstri væng stjórnmálanna.

Eiríkur Rögnvaldsson, prófessor í íslensku, spyr Brynhildi af hverju hún skori ekki á Katrínu Jakobsdóttur forsætisráðherra að þrýsta á utanríkisráðherra. Vinstri græn beri fulla ábyrgð á stöðunni. Brynhildur segir Eirík vega ómaklega að Katrínu og VG.

„Heldur þú í alvöru að forsætisráðherra vilji ekki sækja fólkið til Gaza og bjarga mannslífum? Eða VG? Af hverju í ósköpunum ættum við ekki að vilja það? Forsætisráðherra hefur ítrekað lýst yfir skoðun sinni og vilja til að fá fólkið okkar á Gaza heim. Hvað á hún að gera meira en það? Hún getur ekki skipað utanríkisráðherra eitt eða neitt, ekki frekar en hann henni. Þannig er íslenska lýðræðið byggt upp og ég er ekki viss um að við myndum vilja hafa það öðruvísi í stóra samhenginu.“

Eiríkur segir Katrínu vel geta skipað utanríkisráðherra að beita sér í málinu.

„Ef hann neitar þá á forsætisráðherra að slíta stjórninni. Þannig virkar lýðræðið. Að öðrum kosti ber VG fulla ábyrgð á þessu skelfilega máli. Þið getið ekkert skotið ykkur undan því.“

Brynhildur segist vilja hjálpa fólkinu. Það vilji allir í VG. Þau geri sitt besta.

„Er þetta brandari eða trúirðu þessu sjálf?“ segir Illugi Jökulsson fjölmiðlamaður og rithöfundur sem hefur gagnrýnt Katrínu harðlega undanfarnar vikur og mánuði.

Bjarni Benediktsson utanríkisráðherra sagði í fréttum Stöðvar 2 á þriðjudag að flutningur á 128 manns á Gasa sem eiga kost á dvalarleyfi hér á landi á grundvelli fjölskyldusameiningu væri í skoðun. 

Hann sagði málið flókið, alrangt að Íslendingar væru aðgerðarlausir en ráðherranefndin og ríkisstjórnin yrðu að komast til botns í umræðu um málefni hælisleitenda og móta nýja stefnu. Innviðir landsins væru að hruni komnir vegna fjölda hælisleitenda.

Katrín hefur sagt skipta máli að fyrrnefnt fólk geti notið réttar síns hér á landi. Hún voni að hægt verði að koma fólkinu til landsins. Unnið sé að málinu af þremur ráðuneytum en framkvæmdin hafi verið metin flókin.

Þrjár íslenskar konur sóttu móður og þrjú börn til Gasa í byrjun vikunnar. Þær vinna áfram að því að sækja fleiri af þessum 128 sem eiga kost á dvalarleyfi hér á landi á grundvelli fjölskyldusameiningar, en um er að ræða 75 börn, 44 mæður og níu feður.