Ekki kveðju­stund hjá manninum sem elskar ost­borgara og amerískan fót­bolta

Sumir hafa velt því fyrir sér hvort þessi 65 ára gamli þjálfari gæti mögulegt sett þjálfaraflautuna upp á hillu eftir Super Bowl leikinn á sunnudaginn en hann sjálfur segist ekkert vera að hugsa um slíkt.

Reid tók við starfinu hjá Chiefs aðeins nokkrum dögum eftir að hann var rekinn frá Philadelphia Eagles eftir fjórtán ára starf í borg bróðurkærleikans. Það var árið 2013 og nú eru liðin ellefu ár. Hann hefur síðan byggt upp meistaralið í Kansas City og lykilinn af því var náttúrulega að veðja á leikstjórnandann Patrick Mahomes.

Reid er vinsæll hjá öllum í Kansas City enda frábær þjálfari. Ást hans á ostborgurum er líka öllum kunn enda fékk hann hamborgara í gjöf frá leikmönnum sínum. Amerískur fótbolti og ostbogarar. Þarf eitthvað mikið meira í lífinu.

25. tímabilið hans í NFL

Blaðamenn hafa verið að spyrja Reid út í möguleikann á því að hann myndi hætta eftir leikinn á sunnudaginn. Þetta er 25. tímabil hans í NFL deildinni og hann verður 66 ára gamall í næsta mánuði.

„Mamma og pabbi sögðu við mig þegar þau voru enn að vinna að þú veist sjálfur best hvenær tími þinn er kominn. Ég er tilbúinn í slaginn núna. Keyrum á þetta,“ sagði Andy Reid spakur.

„Þetta sögðu þau alltaf við mig þegar ég ungur. Ég lít á þetta eins í dag. Einhvers staðar einhvern tímann áttar þú þig á því að tíminn sé kominn. Sá dagur er ekki í dag,“ sagði Reid.

Clark Hunt, stjórnarformaður Chiefs, hefur ekki fengið nein skilaboð frá Reid um að að þjálfarinn gæti verið að hætta.

Heldur vonandi áfram sem lengst

„Ég veit bara að hann er á fullu í þessu og nýtur þess. Ég hef enga tilfinningu fyrir því að hann sé að fara hætta á næstunni. Ég veit samt ekki hversu lengi hann endist í þessu en ég vona bara að það verði sem lengst,“ sagði Clark Hunt. Hann segist ekkert vera farinn að velta fyrir því hvað taki við þegar Reid hættir.

Með sigri á sunnudaginn getur Chiefs varið titilinn og það hefur ekkert lið gert í tuttugu ár.

„Ég elska að vera hluti af þessu félagi. Þetta er frábær klúbbur. Við unnum nokkra leiki en við verðum að halda áfram. Við verðum að halda áfram eftir þennan leik,“ sagði Reid.

ESPN fjallar um mögulega ákvörðun Reid og að það séu langmestar líkur á því að hann haldi áfram að þjálfa liðið.

„Hann er á góðum stað, bæði með Pat (Mahomes) en einnig hvað varðar þjálfarateymið og starfsfólkið. Þetta er það sem hann vildi alltaf. Ég tel að hann eigi mikið eftir sem fótboltaþjálfari og ég sé hann fyrir mér þjálfa liðið í mörg ár til viðbótar,“ sagði Brett Veach framkvæmdastjóri Kansas City

Tekur vinnuna með sér í fríið

Það vantar ekki áhugann hjá þeim gamla. Þegar hann fer í frí þá tekur hann vinnuna með sér. Hann eyðir nokkrum tímum á dag í fótbolta hvort sem það er að horfa á myndbönd eða teikna upp möguleg leikkerfi.

„Ég nýt þess. Sumir lesa bækur. Ég skoða leikkerfi,“ sagði Reid.

San Francisco 49ers og Kansas City Chiefs mætast í leiknum um Ofurskálina í ár en Super Bowl hátíðin er að sjálfsögðu sýnd beint á Stöð 2 Sport 2. Útsendingin hefst klukkan 22.00 á sunnudaginn með upphitun fyrir leikinn en leikurinn sjálfur byrjar síðan upp úr klukkan 23.30.