Mourinho vill taka við United á nýjan leik

Samkvæmt Daily Mail er Mourinho afar áhugasamur um að snúa aftur á Old Trafford og taka við stjórn Manchester United á nýjan leik. Samkvæmt fréttinni vill Mourinho meina að hann eigi ókláruð verk á Old Trafford sem hann vill klára.

Mourinho stýrði United á árunum 2016 til 2018 og vann bæði deildabikarinn og Evrópudeildina á tíma sínum hjá United. Hann var rekinn í desember árið 2018 eftir slæma byrjun liðsins þá um haustið. Hann hafði þar að auki átt í deilum við eigendur félagsins og var kominn upp á kant við stuðningsmenn þess.

Þrátt fyrir þetta vill Daily Mail meina að Mourinho vilji gerast knattspyrnustjóri United á nýjan leik og að Portúgalinn margreyndi hafi gert það að sérstöku verkefni sínu að taka við félaginu aftur einhvern tímann í framtíðinni. Mourinho er sagður heillast af nýjum stjórnendum félagsins með Jim Ratcliffe í fararbroddi.

Hvort „Hinn einstaki“ sé inni í myndinni hjá forráðamönnum United er hins vegar óvíst. Síðan hann var rekinn frá Roma hefur hann hafnað tilboði frá Sádi Arabíu og vill halda áfram að vinna í bestu deildum Evrópu.