Vök Bat­hs og vetrar­perlur Austur­lands

„Hjá Vök Baths fá gestir að upplifa einstakan baðstað sem er samofinn náttúrunni,“ segir Kristín Dröfn Halldórsdóttir, framkvæmdastjóri Vök Baths. „Þegar þú kemur gangandi inn á baðstaðinn tekur á móti þér einstakt útsýni yfir Urriðavatnið og laugarnar. Baðgestir geta gengið út í laugina innandyra og á veturna er yndislegt að koma út undir bert loft og anda að sér vetrarloftinu og vera í heitu vatninu og njóta andstæðnanna. Þeir sem vilja geta dýft sér út í Urriðavatn við laugarnar.“

Ég hef komið reglulega í Vök frá því að staðurinn opnaði og hver árstíð hefur sinn sjarma. Það er yndislegt á haustin þegar byrjar að dimma og kólna og sjá norðurljósin þegar vetrar. Á veturna er ekkert betra en að koma við eftir góðan skíðadag og slaka á í Vök Baths. Best er að dýfa sér í ískalt Urriðavatnið út við fljótandi laugarnar – Bryndís Ford

Nokkrar náttúrulaugar hafa sprottið upp hér á landi undanfarin ár en Vök Baths hefur þá sérstöðu að bjóða upp á tvær vakir sem eru fljótandi sjóndeildarlaugar staðsettar úti í Urriðavatni. „Í þeim ná gestir að upplifa einstaka tengingu við náttúruna með útsýni í allar áttir. Auk þess eru á svæðinu gufubað, köld úðagöng og laugarbar.“

Einkennisdrykkur Vök Baths er jurtate úr íslenskum jurtum en heita vatnið sem nýtt er á tebarnum kemur beint úr borholunni. „Heita vatnið hefur fengið þá viðurkenningu að vera hreinasta jarðhitavatnið hér á landi og það eina sem er hæft til drykkjar. Einnig má finna gott úrval drykkja á barnum, til dæmis boozt, krap og bjóra sem eru sérstaklega bruggaðir fyrir Vök en þeir heita Vaka og Vökvi. Á Vök Bistro má einnig njóta ljúffengra veitinga í fallegu umhverfi.“

Austurland er ekki bara gott að sækja heim yfir sumartímann heldur er austfirski veturinn einstakur að hennar sögn. „Á Austurlandi er að finna sem dæmi einstök skíðasvæði, hvort heldur er í Stafdal á Fjarðarheiði eða Oddsskarð við Eskifjörð, sem oft nefnd Austfirsku alparnir. Víða leynast einnig skíðaspor fyrir gönguskíðafólk og er vinsælt að taka góðan hring uppi á Fjarðarheiði eða í Selskógi við Egilsstaði.“

Einnig má finna fjölmörg skemmtileg göngusvæði á Austurlandi auk þess sem svæðið státar einnig af einum stærsta skógi landsins, Hallormsstaðaskógi. 

Það eru sönn lífsgæði að hafa aðgang að stað eins og Vök Baths. Hvort sem það er að njóta sólarinnar að sumri eða ylja sér í frosthörkum að vetri er hægt að ganga að því sem vísu að þaðan fer maður afslappaður á bæði sál og líkama – Vigfús Jónsson

„Skammt frá Vök er einnig eini hreindýragarðurinn á Íslandi sem er staðsettur á bænum Vínlandi á Héraði, rétt við Egilsstaði. Þar er hægt að koma við og heimsækja þá Garp og Mosa. Eftir góðan útivistardag er svo auðvitað tilvalið að koma við í Vök og slaka á.“

Utan náttúruperlna og ótal útivistarmöguleika svæðisins býður Austurland upp á fjölbreytta gistimöguleika. „Á Austurlandi er næga gistingu að hafa, hvort heldur er á Héraði eða niður á fjörðum. Á sumum þessara gististaða er hægt að fá leigð eða lánuð göngusíði, snjóþrúgur eða komast í skemmtilegar vetrarferðir.“

Nú styttist í fyrstu vetrarfrí ársins í skólum landsins og páskafríið skellur á í lok mars. „Það er svo sannarlega uppskrift að góðu fríi að koma austur og skella sér á skíði og eða skoða landið. Svo er tilvalið að enda daginn í Vök Bahts, slaka á og njóta náttúrunnar, enda fáar leiðir betri til að endurnæra líkamann eftir útivist dagsins.

Nánari upplýsingar á vokbaths.is.