Ís­landi nú spáð þriðja sæti í Euro­vision

Enn er ekki búið að velja framlag Íslands en tilkynnt var í vikunni að RÚV hafi rofið tengsl söngvakeppninnar og Eurovision. Það kemur því til ákvörðunar eftir að úrslit Söngvakeppninnar liggja fyrir hvort framlag Íslands verði sent út til Malmö.

Gera má ráð fyrir að þetta mikla stökk sem Ísland hefur tekið í veðbönkum megi rekja til fréttar Vísis í gær um að palestínski tónlistarmaðurinn Bashar Murad muni keppa í Söngvakeppninni. Murad er búsettur í Austur-Jerúsalem og ætti að vera Íslendingum nokkuð kunnur en hann gaf út lag með hljómsveitinni Hatara eftir Eurovision ævintýri hennar í Tel Aviv árið 2019. 

Í morgun var Ísland komið í sjöunda sæti í veðbönkum en fyrir það hafði það setið í 18. og 20. sæti. Keppendur í Söngvakeppninni verða kynntir formlega til sögunnar á laugardag en forkeppnin hér heima hefst 17. febrúar næstkomandi á RÚV.