Kostu­­legur hvala­flutningur myndi toppa ráðu­neytis­flakk Bjarna

Inga Sæland, formaður Fólks flokksins hefur verið mjög afdráttarlaus um Svandísi. Hún eigi einfaldlega ekki að vera ráðherra, hafi brotið lög og eigi að segja af sér. Aðrir stjórnarandstöðuþingmenn hafa haldið spilunum þéttar að sér, segjast bíða eftir viðbrögðum ríkisstjórnarinnar.

Hildur Sverrisdóttir, þingmaður Sjálfstæðisflokksins, sagðist vænta einhvers konar viðbragða frá Vinstri grænum þegar að tillagan hefur verið lögð fram en vildi ekki úttala sig um hvaða viðbragða hún vænti, það væri á borði VG.

Fréttastofa ræddi við Sigmund Davíð Gunnlaugsson, formann Miðflokksins, um málið, vantrauststillöguna og ríkisstjórnina.

Við það að verða niðurlægjandi fyrir Sjálfstæðismenn

Hvað heldurðu að þetta geti þýtt, að viðbrögðin frá VG skipti núna máli frá því tillagan er komin fram en áður en hún er afgreidd?

 „Sjálfstæðismennirnir eru lengi búnir að vera að bíða eftir viðbrögðum frá VG. Spurningin er bara hversu lengi ætla þeir að bíða? Fram í september 2025? Ég veit það ekki,“ segir Sigmundur.

„Þeir hafa vonast til að VG myndi leysa úr sínum málum en það er engin von á því að því er virðist. Þetta er svona við það að verða niðurlægjandi fyrir Sjálfstæðismennina að láta VG ekki einu sinni svara sér hvað þeirra viðbrögð varðar.“

Ekki stjórnarandstöðunnar að verja ríkisstjórnina

Þú hefur talað um að þeir stjórnarandstöðuþingmenn sem þú hefur talað við ætli að styðja við tillöguna. Áttu von á því að hún nái fram að ganga?

„Talningin á sínum tíma var þannig að ég gerði ráð fyrir að allir stjórnarandstöðuþingmenn myndu styðja vantrauststillögu eins og venjan er þegar menn eru í stjórnarandstöðu. Það er ekki þeirra að verja ríkisstjórn. En einnig að það væri meirihluti fyrir tillögunni, ekki hvað síst vegna afstöðu þingmanna Sjálfstæðisflokks og einhverja Framsóknarmanna,“ segir Sigmundur.

„Hefur það eitthvað breyst í millitíðinni? Ég veit það ekki. Ef það hefur gert það þá hafa þeir hinir sömu bara verið að leita að afsökun fyrir því að þurfa ekki að fella ráðherrann og geta haldið áfram öllu óbreyttu og gert ekki neitt næsta eitt og hálfa árið,“ bætir hann við.

Hvalaflutningur myndi toppa ráðherraflakk

Í samtali við Vísi í kvöld sagði Þorbjörg Sigríður Gunnlaugsdóttir, þingmaður Viðreisnar, að það væri verið að pískra niður á Alþingi að færa ætti hvalamálin frá Svandísi og yfir í eitthvað annað ráðuneyti. Sigmundur var spurður hvort hann hefði heyrt af þessu og hvort það væri viðunandi niðurstaða.

„Ég hef heyrt af þessari kostulegu hugmynd. Sjálfstæðisflokkurinn fann upp á nýrri leið til að menn segðu af sér, að fara yfir í annað ráðuneyti. En þetta væri til þess fallið að toppa það. Taka bara málaflokkinn sem vandinn snýst um og færa hann eitthvert annað,“ segir Sigmundur. 

„En hvað á að verða um hvalina? Eiga þeir að fara í félagsmálaráðuneytið, velferðarsvið þar? Ég veit það ekki.“

„Þetta væri fyrst og fremst kostulegt og myndi sýna þann vanda sem ríkisstjórnin er í þannig ég á ekki von á að þetta verði niðurstaðan,“ segir hann að lokum.