Við­ræður breiðfylkingar ASÍ og SA í upp­námi

Í viðræðum breiðfylkingar stéttarfélaga innan Alþýðusambandsins og Samtaka atvinnulífsins undanfarnar vikur hefur verið gengið út frá krónutöluhækkunum launa í samningum til þriggja ára. Samtök atvinnulífsins hafa nú lagt fram hugmyndir um blandaða leið og að tillit verði tekið til launaskriðs sem muni verða, þar sem krónutöluhækkanir væru einnig í raun hlutfallsleg hækkun launa.

Ragnar Þór Ingólfsson formaður VR segir Samtök atvinnulífsins ekki lengur samþykkja það kostnaðarmat sem unnið hafi verið út frá í viðræðunum.

„Sem er þá kostnaðarmat sem rammast innan væntinga Seðlabankans. Til þess að hér sé hægt að fara í bæði vaxtalækkunarferli og vinna gegn verðbólgu,“ segir Ragnar Þór.

Það gefur augaleið að þegar laun hækka í krónum en ekki prósentum að lægstu laun hækka hlutfallslega meira en þau hærri. Þannig myndu 400.000 króna mánaðarlaun sem hækkuðu um þrjátíu þúsund krónur hækka um 7,5 prósent á meðan milljón króna laun hækkuðu um 3 prósent.

Samtök atvinnulífsins segja reynsluna sýna að þeir hærra launuðu sæki sér mismuninn með launaskriði. Þetta telur SA að taka þurfi inn í kostnaðarmatið.

„Þetta er í rauninni svívirðilegt að nálgast málið með þessum hætti. Að ætlast til að fólk á almennum vinnumarkaði, millitekjuhópar og láglaunafólk, taki á sig væntanlegar hækkanir hæstlaunuðu hópanna. Þetta er fordæmalaust,“ segir formaður VR.

Sigríður Margrét Oddsdóttir framkvæmdastjóri SA segir að til að ná fram markmiðum um hjöðnun verðbólgu og lækkun vaxta verði allir að hugsa tölur með öðrum hætti en áður.

„Það er gagnkvæmur skilningur allra samningsaðila um mikilvægi þess að lægstu launin hækki hlutfallslega umfram almennar launahækkanir,“segir framkvæmdastjórinn. Markmiðin væru sameiginleg og Samtök atvinnulífsins hefðu ekki slitið viðræðum við breiðfylkinguna.

„Það eru akkúrat þessi sameiginlegu markmið okkar og verkalýðshreyfingarinnar um að gera langtíma, skynsama kjarasamninga sem er innistæða fyrir til að ná niður verðbólgunni. Svo það sé hægt að lækka hér stýrivexti sem valda því að við þurfum núna og erum einmitt að takast á um útreikninga og aðferðafræði. Það sem skiptir máli í þessu samhengi er að það þurfa allir að axla ábyrgð,“ segir Sigríður Margrét.

Formaður VR vonar að Samtök atvinnulífsins dragi í land. Annars þurfi að taka afstöðu til þess að vísa deilunni til ríkissáttasemjara og eða leggja fram nýja kröfugerð sem taki ekki endilega mið af markmiðum um minni verðbólgu og lækkun vaxta. Vinna aðila vinnumarkaðarins með stjórnvöldum hljóti að vera í uppnámi.

„Þetta er bara staðan. Við getum ekki farið á fjórar fætur gagnvart atvinnulífinu sem hefur malað gull síðustu ár. Alla vega flest fyrirtæki. Til að bera ein þennan stöðugleika á okkar herðum. Það þurfa allir að taka þátt og eins og staðan er í dag eru Samtök atvinnulífsins ekki tilbúin í þá vegferð,“ segir Ragnar Þór Ingólfsson.