Hent út úr ítölsku deildinni ef þau velja Ofurdeildina

Frá þessu greinir meðal annars hinn virti ítalski blaðamaður Fabrizio Romano. Hann segir ítalska sambandið hafa samþykkt reglu sem segir að ítölsk lið megi aðeins taka þátt í keppnum á vegum UEFA, FIFA og ítalska sambandsins.

Ákveði eitthvert ítalskt félag að ganga til liðs við Ofurdeildina þá verði það einfaldlega ekki með í Seríu A á næstu leiktíð.

Evrópudómstóllinn úrskurðaði um það skömmu fyrir jól að það væri ólöglegt af FIFA og UEFA að banna félögum að taka þátt í Ofurdeildinni. Þar með virtist á ný opnast sá möguleiki að af stofnun Ofurdeildarinnar yrði.

Stóru félögin í Evrópu hafa hins vegar í kjölfarið, flest alla vega, keppst við að senda frá sér yfirlýsingar þess efnis að þau ætli ekki að taka þátt í Ofurdeildinni.

Ítalska knattspyrnusambandið hefur hins vegar gengið skrefinu lengra til að auka enn líkurnar á að ítölsk félög verði ekki með í neinni einkadeild.