Gerir ekki lítið úr alvarleikanum en segir alls ekki tíma­bært að rýma Grinda­vík

Vísindamenn á Veðurstofu Íslands hafa talað einum rómi. Engin merki séu um að kvika sé að færast ofar í jarðskorpunni og lagt áherslu á að afar ólíklegt sé að versta sviðsmyndin raungerist og sagt líklegast að þenslan og skjálftarnir hætti án eldgoss.

Tveir mikilsmetnir prófessorar sem báðir starfa við Háskóla Íslands hafa ítrekað mikilvægi þess að koma upp varnargörðum. Annar þeirra vill rýma Grindavík og hinn segir að það sé einungis dagaspursmál hvenær gjósi.

Fólk ringlað vegna ólíkrar sýnar á þróunina

Magnús Tumi Guðmundsson prófessor í jarðeðlisfræði var spurður hvað væri þess valdandi að vísindamenn hefðu svo ólíka sýn og túlkun á þróunina en samt aðgang að sömu gögnum. Og væri það nema von að fólk væri dálítið ringlað?

„Ég held að sýnin sé nú kannski ekki alveg svo misjöfn, það er aðeins misjafnt hvernig menn leggja þetta upp. Þegar verið er að horfa á svona atburði þá er best að horfa á annars vegar söguna; hvernig hegða mismunandi svæði sér og hvað segja gögnin sem núna eru aðallega aflögunargögn og jarðskjálftagögn og hvernig ber að túlka þetta.“

Sjá nánar: Íbúar í Grindavík geta verið rólegir

„Það sem er kannski mikilvægast er að kvikan er safnast fyrir á fimm km dýpi og þetta getur endað með eldgosi, það vita það allir en það er algengara almennt séð að svona innskot hætti áður en að gýs en við getum ekkert gefið okkur neitt í þessum efnum.“

Kvika sé ekki farin að brjóta sér leið síðustu fimm kílómetrana

Magnús Tumi undirstrikar að á Veðurstofunni séu margir vísinda-og fræðimenn sem rýni í þau gögn sem til staðar eru hverju sinni. Hans túlkun þróuninni sé sú sama og annarra á Veðurstofu Íslands.

„Það er kannski blæbrigðamunur hvernig fólk horfir á þetta en varðandi þá mynd sem Veðurstofan setur fram þá er hún niðurstaða hópfunda þar sem koma margir fram og kynna mismunandi gögn og síðan er komist að niðurstöðu. Aðalatriðið í þessu núna er það að kvika er ekki að brjótast upp þessa síðustu fimm kílómetra sem er býsna mikill þröskuldur og ef það færi að gerast þá eru skammtímaforboðar sem ekki færu framhjá og þeir hafa ekki gert það í áratugi að eitthvað slíkt sé að gerast og það eru nokkrir klukkutímar eða jafnvel nokkrir dagar eins og hefur verið í Reykjaneseldum fram að þessu eða sem sagt í Fagradalsfjalli.“

Slík merki um að bráðlega gjósi sjáist ekki á þessari stundu.

„Kvikan er ekki byrjuð að brjóta sér leið upp til yfirborðs en við þurfum að vera viðbúin þeirri sviðsmynd en það mun gefast ákveðinn fyrirvari til bregðast við. Það eru vissulega mismunandi sjónarmið en mikill meirihluti er á því og svona flestir að við þurfum að taka þessum atburðum með ró og yfirvegun.“

Kvikuinnskotið við Þorbjörn er það fimmta í röðinni og þenslan í núverandi lotu er hraðari en fyrri.

„Við skulum ekkert gera lítið úr því að ástandið er alvarlegt og það er fylgst með því mjög náið en við erum alls ekki komin þangað að það sé ástæða til að rýma Grindavík til dæmis. Það er ekkert hægt að útiloka að til þess komi en við erum bara alls ekki þar.“

Það sé meira en að segja það að rýma heilt bæjarfélag.

“Það er meiriháttar röskun og fullt af vandamálum sem fylgir því. Það er ekkert í lífinu án áhættu og hver er ásættanleg áhætta? Miðað við stöðuna þá er áhættan í Grindavík gagnvart fólki bara mjög lítil. Það getur orðið eignatjón síðar ef verstu sviðsmyndir raungerast sem er alls ekki það líklegasta. Því gos sem hafa orðið þarna búa ekki til neitt mjög stór hraun. Það eru ekki mjög stór gos sem verða þarna.“