Stofnuðu stuðnings­manna­klúbb Nott. For­est á Ís­landi: „Við erum fleiri en ég átti von á“

Síðasta sunnudag var stuðningsmannaklúbbur Nottingham Forest á Íslandi formlega settur á laggirnar. Stofnfundurinn fór fram á Ölveri í Glæsibæ þar sem meðlimir hins nýja stuðningsmannaklúbbs sáu Forest sigra Aston Villa, 2-0.

„Fyrir um tíu árum varð til Facebook-síða þar sem smátt og smátt söfnuðust inn stuðningsmenn Forest á Íslandi. Svo þegar liðið komst upp í ensku úrvalsdeildina fyrir síðasta tímabil fjölgaði í hópnum og þá kviknaði áhugi að gera þetta formlega, að stofna klúbb eins og er til fyrir önnur félög á Íslandi. Það varð úr að á sunnudaginn héldum við stofnfund á Ölver þar sem tuttugu manns mættu,“ sagði Árni Freyr Helgason, einn meðlima stuðningsmannaklúbbs Forest á Íslandi, í samtali við Vísi.

Í Facebook-hópnum góða eru um sjötíu manns og Árni á von á því að meðlimum stuðningsmannaklúbbsins muni fjölga á næstunni.

„Við erum fleiri en ég átti von á. Fyrstu árin fannst maður eins og það væru fáir ef einhverjir væru í sömu sporum. En það hefur komið skemmtilega óvart hversu margir hafa skriðið fram í dagljósið undanfarin misseri og það var gaman að hitta þá og spjalla um eitthvað ekkert rosalega margir geta spjallað um; málefni Forest,“ sagði Árni.

Þrátt fyrir að blómaskeið Forest hafi verið í kringum 1980, þegar liðið varð Englandsmeistari og Evrópumeistari í tvígang undir stjórn Brians Clough, segir Árni að stuðningsmenn Forest á Íslandi séu á öllum aldri.

„Ég er í yngri kantinum en það voru samt tveir yngri en ég á stofnfundinum. En sá elsti byrjaði að halda með Forest þegar hann var námsmaður í Nottingham á 7. áratugnum,“ sagði Árni en í hans tilfelli gengur fylgnin við Forest í erfðir en faðir hans er stuðningsmaður liðsins.

„Eins og margir af minni kynslóð var ég Manchester United-maður til að byrja með. En um það leyti sem ég byrjaði að læra ensku fór ég að leita í bækur niðri í kjallara hjá pabba og þá rambaði maður á ævisögur leikmanna liðsins og sögur frá gamla tímanum. Þá snerist maður hægt og rólega,“ sagði Árni.

Hann segir öllu skemmtilegra að vera stuðningsmaður Forest í dag en fyrir nokkrum árum þegar allt var í steik hjá félaginu.

„Mín kynslóð hafði aldrei séð Forest í efstu deild áður. Ég byrjaði að halda með liðinu þegar það var í þriðju efstu deild. Þetta er stórt félag með mikla sögu og það eru miklar væntingar sem fylgja því. Stefnan var alltaf sett á að fara upp í úrvalsdeildina en síðan var það einhvern veginn frátekið fyrir alla aðra en okkur. Inn á milli var þetta bölvað basl og við tæpir á að falla úr næstefstu deild,“ sagði Árni.

„En síðustu tvö og hálft ár hafa verið ævintýri líkust fyrir alla stuðningsmenn Forest. Það átti enginn von á því þegar Chris Houghton var rekinn með eitt stig á botni næstefstu deildar að við færum beint upp og myndum halda okkur uppi.“

Að sögn Árna er lykilmaðurinn í góðum árangri Forest undanfarin misseri er knattspyrnustjórinn Steve Cooper.

„Ekki spurning. Eigandinn [Evangelos Marinakis] má eiga það að hlutirnir hafa smátt og smátt færst til betri vegar eftir að hann keypti félagið. Eigandinn þar á undan lagði félagið allt að því í rúst. En það er ekki hægt að horfa framhjá því að tröppugangurinn eftir Cooper tók við hefur verið svakalegur. Hann er með stuðningsmennina og leikmennina á sínu bandi,“ sagði Árni.

En hvaða leikmenn eru í mestu uppáhaldi hjá honum?

„Okkur rosalega vænt um uppöldu strákana okkar, Ryan Yates og Joe Worrall. Þeir eru algjörir leiðtogar, innan vallar sem utan. Morgan Gibbs-White er mjög vinsæll sem og framherjinn Taiwo Awoniyi og sá nýjasti sem hefur slegið í gegn hjá okkur er miðvörðurinn Murillo. En heimastrákarnir eiga sérstakan sess í hjarta stuðningsmanna félagsins,“ svaraði Árni sem verður með augun á skjánum þegar Forest sækir West Ham United heim í ensku úrvalsdeildinni í dag.