Þarf að hugsa extra vel um mig og þá er þetta bæri­legt

Sævar Atli hefur verið fastamaður í liði Lyngby sem hefur byrjað tímabilið í Danmörku af krafti eftir að bjarga sér á ævintýralegan hátt á síðustu leiktíð. Hann var ekki með íslenska landsliðinu í nýafstöðnu verkefni gegn Lúxemborg og Liechtenstein þar sem hann er að glíma við meiðsli og fékk frí.

„Þetta er smá flókið, er að æfa og spila í rauninni en er með tegund af kviðsliti. Mun þurfa að spila og æfa svona út árið að minnsta kosti, þetta er erfitt og er byrjað að hafa smá áhrif á daglegt líf núna. Þarf að hugsa extra vel um mig og þá er þetta bærilegt. Maður ætlar að reyna halda verknum bærilegum út árið,“ sagði Sævar Atli um meiðslin. Hann var svo spurður hvort hann væri ekki að pína sig með því að spila í gegnum meiðslin.

„Jújú en maður er alinn upp þannig í Leikni Reykjavík að maður þarf bara að komast í gegnum þetta. Ég er 100 prósent viss um að margir íþróttamenn gangi í gegnum meiðsli á einhverjum tímapunkti og þeir harki af sér. Spilar ekki marga leiki á tímabilinu 100 prósent heill, þetta er bara svona. Ég mun komast í gegnum þetta, ekkert mál.“

Engin íslenska í klefanum

Freyr Alexandersson, þjálfari Lyngby, hefur myndað ákveðna Íslendinganýlendu hjá félaginu en sem stendur eru Sævar Atli, Gylfi Þór Sigurðsson, Kolbeinn Birgir Finnsson og Andri Lucas Guðjohnsen á mála hjá félaginu. Sá síðastnefndi er á láni frá IFK Norrköping í Svíþjóð. 

„Erum komnir með nýja sekt í „sektarformúluna“ okkar. Það er bannað að tala íslensku, vilja meina að við tölum of mikla íslensku inn í klefanum. Við höldum klárlega mikið hópinn og ég, Kolbeinn og Andri Lucas erum nálægt hver öðrum í aldri.“

„Ég er með samning til 2025 og líður mjög vel. Maður má ekki fara fram úr sér núna, Freysi yrði ekki ánægður með það en eins og staðan er núna getum við náð frábærum árangri og besta árangri Lyngby lengi. Ef það gengur upp þá mun ég allavega klára samninginn minn en maður stefnir alltaf hærra og vonandi kemst ég hærra. Eins og er líður mér mjög vel og ætla að reyna spila ennþá betur á næsta ári,“ sagði Sævar Atli að lokum en ljóst er að honum líður vel hjá félaginu og það metur hann mikils. 

Sævar Atli og félagar mæta AGF í hádeginu á sunnudag. Sigur þar gæti lyft Lyngby upp í 4. sætið.