Rafha fagnar af­mælinu í nú­tíma­legum búningi

„Við erum svo sannarlega fornfrægt fyrirtæki sem er gamalt en alls ekki gamaldags,“ segir Egill Ingvason, framkvæmdastjóri Rafha. „Á síðasta ári réðumst við í viðamiklar framkvæmdir með það fyrir augum að færa Rafha í nútímalegri búning með gerbreyttri verslun og nýrri nálgun við viðskiptavini okkar. Þær breytingar hafa meðal annars skilað því að nú eru viðskiptavinir okkar yngri en áður.“

Verslunin á Suðurlandsbraut 16 í Reykjavík var hönnuð frá grunni af Hafsteini og Karítas í HAF STUDIO og hafa breytingarnar fengið stórkostlegar undirtektir. Egill segir að markmiðið hafi verið að skapa einstakt umhverfi og upplifun í anda sérverslunar þar sem lífsstíll, hönnun, heilsa og allt til matargerðar væri haft að leiðarljósi. „Við töldum það nauðsynlegt, enda eiga hefðbundnar verslanir í vök að verjast þar sem netverslun hefur stóraukist og því þarf að gefa viðskiptavinum ríkari ástæðu til að fara í hefðbundna verslun. Tímarnir breytast og mennirnir með. Gamla verslunin þjónaði ekki tilgangi sínum lengur enda hafa heimilisvenjur, samfélagsmynstur, matarvenjur, lífsstíll og annað gjörbreyst á undanförnum árum.“

Raftækjaverksmiðjan hf. í Hafnarfirði, eða Rafha, var stofnuð árið 1936. Rafha eldavélin er ómissandi hluti að sögu þjóðarinnar en í langan tíma framleiddi Rafha mun fleiri tegundir raftækja. Framleiðslunni var hætt árið 1990 og í dag flytur Rafha inn og selur heimilistæki frá heimsþekktum vörumerkjum á borð við Electrolux, AEG, Siemens, Samsung, Bosch og LG ásamt eldhúsinnréttingum frá danska merkinu Kvik.

Vel tekið á móti viðskiptavinum

Sem dæmi um breytingar nefnir Egill að í nýju versluninni sé tekið á móti viðskiptavinum með kaffiveröld þar hægt er að fá kaffivélar sem mala baunir, vélar fyrir kaffihylki eða uppáhellingarvélar. „Svo er hægt að kaupa bæði fylgihluti, kaffi og síróp fyrir kaffidrykkina.“

Vínmenning þjóðarinnar er sömuleiðis allt önnur en áður og eftir breytingar var hannaður einskonar bar inni í miðri verslun þar sem aukið úrval af vínkælum er nú til sýnis og sömuleiðis allt fyrir heimabarinn. „Við vitum líka að flest okkar tæki eru notuð til að búa til eða geyma mat og þar leggjum við sérstaka áherslu á að geta miðlað af þekkingu okkar varðandi allt sem tengist matargerð og bakstri og hvernig tækin okkar koma að notum við ólíkar aðstæður.“

Aðrar kröfur en áður

Egill segir að í dag geri viðskiptavinir Rafha líka kröfur um að tækin séu notendavæn og umhverfisvæn. „Þvottavélarnar og þurrkarar eiga að fara betur með fötin okkar, slíta þeim síður og sömuleiðis leggjum við áherslu á að kæli- og frystitæki geymi matvælin við kjöraðstæður til að auka geymsluþolið og lágmarka matarsóun.“

Í nýju versluninni eru heilsutengdum vörum einnig gerð betri skil, s.s. hverskyns húð- og hártæki og tæki til tannumhirðu. „Við fjölguðum vörum og vöruflokkum mjög mikið og tókum inn hönnunar- og lífsstílsmerki eins og Dualit, Kitchenaid, Stelton, matvöru frá Nicolas Vahé og snyrtivörur frá Meraki sem henta vel til tækifærisgjafa eða sjálfsdekurs.“

Þjónustan skiptir öllu máli

Rafha er einnig stolt af því að geta boðið, ólíkt mörgum öðrum, allar eldhús- og baðinnréttingar ásamt fataskápum frá Kvik í Danmörku með raftækjunum sem verslunin selur. „Kvik er leiðandi danskur innréttingaframleiðandi þar sem skandinavísk hönnun og einfaldleiki ræður ríkjum. Við teljum að þetta eigi ákaflega góða samleið með raftækjunum okkar og við getum sýnt tækin okkar í sínu rétta umhverfi.“

Egill segir kaupferlið allt annað hjá Rafha en annars staðar og undirbúningurinn sé því mikilvægur. „Þar skiptir þjónustan öllu máli. Við leggjum áherslu á samtalið við viðskiptavini, að greina óskir þeirra og þarfir og reynum eftir fremsta megni að uppfylla þær. Einnig nýtum við okkur vandaðar þrívíddar teikningar til að koma hugmyndunum á blað og fylgjum síðan viðskiptavinum í gegnum allt ferlið ef þess er óskað.“

Nánari upplýsingar má finna á rafha.is.