Óttast að and­leg veikindi hafi tekið sig upp á ný

„Fjölskyldan er öll örmagna. Við erum auðvitað rosalega áhyggjufull. Maður sefur svo sem ekki mikið og borðar ekki mikið. Stundum finnst manni að maður nái ekki að hugsa skýrt eða halda utan um þetta allt saman því við höfum öll svo miklar áhyggjur.“

Þetta segir Rannveig Karlsdóttir, systir Magnúsar Kristins Magnússonar, sem leitað er í Dóm­in­íska lýðveld­inu. Ekkert hefur spurst til Magnúsar í átta daga, eða frá 10. september þegar hann átti að fljúga til Frankfurt en skilaði sér ekki í flugið. Rætt var við Rannveigu í Bítinu á Bylgjunni í morgun. 

Hún segir Magnús eiga stóran systkina- og vinahóp sem sæki styrk til hvers annars. Magnús eigi einnig ungan son og fósturson og mikilvægt sé að halda vel utan um þá á þessum erfiðu tímum.

Glímdi við andleg veikindi 

Áður en Magnús fór til Dóminíska lýðveldisins hafði hann verið á Spáni. Rannveig segir að lítið sé vitað um ástæður ferðalagsins. Hins vegar hafi hann glímt við andleg veikindi fyrir nokkrum árum.

„Hann hefur svolítið fjarlægst okkur í sumar. Við óttumst svolítið að hann sé kannski kominn á einhvern óþægilegan stað núna og þess vegna hafi hann tekið þessa hvatvísu ákvörðun að skella sér til Spánar, og síðan fengið þá hugmynd að fara til Dóminsíska Lýðveldisins. Og þess vegna erum við svolítið hrædd.“

Rannveig segir fjölskylduna hafa fengið óljósar og óstaðfestar fregnir af því að Magnús hafi farið upp á flugvöll, hugsanlega misst af fluginu og skilið farangurinn eftir. Seint í gærkvöldi fengu þau óstaðfestar fréttir af því að hugsanlega séu til myndir af honum yfirgefa flugvöllinn.

„Og maður er svolítið hræddur um að kannski hafi hann fyllst örvæntingu ef hann missti af fluginu og er veikur fyrir. Þetta er afburðaríþróttamaður sem er mjög hraustur og vanur að standa sig. Þannig að honum hefur ekki fundist auðvelt að takast á við þetta.“

Reyna að koma á sambandi við trausta aðila úti

Nú sé verið að vinna í því að komast í samband við fólk á staðnum sem geti aðstoðað.

„Fólk hér heima sem þekkir vel til í Dómíníska lýðveldinu og er þaðan hefur sagt okkur að fara ekki út í það að borga neinum neitt nema við treystum viðkomandi alveg fullkomlega og að þetta sé einhver sem veit hvað hann er að gera. Við erum að reyna að koma á þannig samskiptum núna með hjálp ótrúlegasta fólks. Við erum mjög þakklát fyrir hvað fólk hefur reynst okkur vel og er tilbúið að aðstoða okkur.“ 

En eðlilega, maður veit svo sem hvernig maður myndi bregðast við sjálfur ef maður fengi allt í einu símtal utan úr heimi eða eitthvað bréf, ég veit ekki hvort maður myndi taka neitt mark á því.

Þá sé unnið að því að nálgast gögn úr farsíma Magnúsar og kanna hvort einhverjar færslur séu á bankareikningi hans. Lögreglan, utanríkisráðuneytið og borgaraþjónusta vinni að málinu. Þá segir Rannveig að fjölmiðlar í Dómíniska lýðveldinu hafi margir reynst þeim vel.

„Það er sérstaklega ein fréttakona sem hefur verið mjög dugleg. Hún gat til dæmis fengið það staðfest fyrir okkur að hann hefði pottþétt ekki farið úr landi og væri greinilega þarna enn þá.“

Við vonum bara að við fáum hann heilan heim. Það er það sem við óskum mest af öllu.

Magnús Kristinn er fæddur 1987, um það bil 185 sentímetrar á hæð, grann- og íþróttamannslega vaxinn. Hann er með gráblá augu, dökkhærður, mjög snöggklipptur og með dökka skeggrót.

 Þeir sem gætu haft upplýsingar um ferðir Magnús­ar er bent á að hafa sam­band við lög­regl­una á höfuðborg­ar­svæðinu í síma 444-1000 eða við syst­ur Magnús­ar, Rann­veigu Karls­dótt­ur, í síma 660-4313.